„გამომიგზავნე პურის ფული“ — სოფიკო ჭიაურელის მოსკოვური სტუდენტობა და მხიარული მოგონება

დიდი ქართველი არტისტის, სოფიკო ჭიაურელის ახალგაზრდობის წლები მოსკოვში სწავლასა და მხიარულ სტუდენტურ ცხოვრებას უკავშირდება. თბილისიდან მამა მას ყოველთვიურად 200 მანეთს უგზავნიდა, რაც იმ პერიოდისთ���ის საკმაოდ სოლიდურ თანხად ითვლებოდა. ამას ემატებოდა კუთვნილი სტიპენდიაც, თუმცა ახალგაზრდა მსახიობი და მისი მეგობრები ფულს დიდხანს ვერ ინარჩუნებდნენ.

მიღებულ თანხას მეგობრები სულ რაღაც ერთ კვირაში ქეიფსა და გართობაში ხარჯავდნენ, რის შემდეგაც თვის ბოლომდე სრულიად უფულოდ რჩებოდნენ. ასეთ დროს მათ სასწავლებლის ბუფეტი ეხმარებოდათ, სადაც პური, შაქარი, მარილი და მდოგვი უფასოდ იდო. მსახიობს მთელი ცხოვრება გაჰყვა იმ პერიოდის განსაკუთრებული „დელიკატესი“ — მარილითა და მდოგვით შეზავებული შავი პურის გემო.

ერთ-ერთ დაბადების დღეზე სოფიკოს თბილისიდან მამისგან დეპეშა და 30 მანეთი მოუვიდა. გზავნილში ეწერა: „გილოცავ, გკოცნი, გიგზავნი ტორტის ფულს“. პასუხმაც არ დააყოვნა — მოსკოვიდან თბილისში სტუდენტური იუმორით სავსე დეპეშა გაიგზავნა: „მამიკო, დიდი მადლობა, ტორტის ფული მივიღე, გამომიგზავნე პურის ფული“.