საპატრიარქო 2008 წლის აგვისტოს ომის წლისთავთან დაკავშირებით განცხადებას ავრცელებს

საქართველოს საპატრიარქო რუსეთ-საქართველოს ომთან დაკავშირებით სპეციალურ მიმართვას ავრცელებს. განცხადებაში ხაზგასმულია ის უმძიმესი ტკივილი და დანაკარგი, რომელიც ქვეყანამ 2008 წლის აგვისტოს ტრაგიკულ დღეებში განიცადა — ტერიტორიების დაკარგვა, ათასობით დევნილი და სამშობლოსათვის შეწირული გმირები.

საპატრიარქოს ცნობით, 8 აგვისტოს ქვეყნის ყველა მოქმედ ტაძარში საღმრთო ლიტურგია და პანაშვიდები აღევლინება, სადაც ომში დაღუპული მშვიდობიანი მოქალაქეებისა და სამხედრო მოსამსახურეების სულების საოხად ილოცებენ.

განცხადებაში განსაკუთრებული ყურადღება გამახვილებულია სრულიად საქართველოს კათოლიკოს-პატრიარქის, ილია II-ისა და მართლმადიდებელი ეკლესიის ღვაწლზე ომის მიმდინარეობისას. ეკლესიის წარმომადგენლები, საკუთარი სიცოცხლის რისკის ფასად, ცხელი წერტილებიდან დაჭრილების, ტყვეებისა და დაღუპულების გამოყვანას ცდილობდნენ, რათა გარდაცვლილებს ღირსეული პატივი მიგებოდათ.

საპატრიარქო სამშობლოს თავისუფლებისთვის დაცემულ გმირებს მარადიულ ხსოვნას უსურვებს და სრულიად საქართველოს მშვიდობას, ერთიანობასა და ტერიტორიულ მთლიანობას ევედრება.