ჯგუფური თავდასხმა კურიერზე თბილისში: პოლიციამ 3 პირი დააკავა

თბილისში, ყაზბეგის გამზირზე მომხდარი ჯგუფური ძალადობის ფაქტზე სამართალდამცველებმა სამი პირი დააკავეს, რომელთაგან ორი არასრულწლოვანია. შინაგან საქმეთა სამინისტროს ვაკე-საბურთალოს მთავარი სამმართველოს თანამშრომლებმა ოპე���ატიულ-საგამოძიებო მოქმედებები ცხელ კვალზე ჩაატარეს.

გამოძიების ინფორმაციით, 7 აგვისტოს ბრალდებულებმა, ორ თანამზრახველთან ერთად, კომპანია „გლოვოს“ კურიერს სიტყვიერი და ფიზიკური შეურაცხყოფა მიაყენეს, რის შემდეგაც შემთხვევის ადგილიდან მიიმალნენ. დაშავებულ კურიერს სამედიცინო დაწესებულებაში შესაბამისი დახმარება გაუწიეს.

პოლიციამ სამი ეჭვმიტანილი მომდევნო დღესვე აიყვანა. ამ ეტაპზე ინტენსიურად გრძელდება საგამოძიებო ღონისძიებები ინციდენტში მონაწილე კიდევ ორი პირის ადგილსამყოფლის დასადგენად და მათ დასაკავებლად. საქმეზე გამოძიება საქართველოს სისხლის სამართლის კოდექსის 126-ე პრიმა მუხლით მიმდინარეობს, რაც ჯგუფურად ჩადენილ ძალადობას გულისხმობს.