ინფრასტრუქტურული სიახლეები ოზურგეთში: რას გეგმავს მერია ცენტრალურ პარკში

ოზურგეთის მუნიციპალიტეტის ცენტრალურ ნაწილსა და ჭადრების პარკში მნიშვნელოვანი ინფრასტრუქტურული და მემორიალური ცვლილებები იგეგმება. ადგილობრივი ხელისუფლების ცნობით, პროექტების განხორციელებისას მოსახლეობის პოზიცია მაქსიმალურად იქნება გათვალისწინებული.

ქალაქის მერმა, პაატა კუნჭულიამ სოციალურ ქსელში გავრცელებულ განცხადებაში აღნიშნა, რომ თემისადმი არსებული მაღალი საზოგადოებრივი ინტერესის გამო, დაგეგმილი სიახლეების შესახებ დეტალური ინფორმაცია საზოგადოებას უახლოეს პერიოდში მიეწოდება.

ამ ეტაპზე ჯერჯერობით უცნობია, შეეხება თუ არა მოსალოდნელი ცვლილებები ბენია ჩხიკვიშვილის ბიუსტს. შეგახსენებთ, რომ აღნიშნული ძეგლის წინ მერიის მიერ საინფორმაციო ეკრანის განთავსებამ ადგილობრივ მოსახლეობაში უკმაყოფილება და პროტესტი გამოიწვია.