ქურდობა თვითმფრინავის ბორტზე: თბილისის აეროპორტში ჩინეთის ორი მოქალაქე დააკავეს

შინაგან საქმეთა სამინისტროს თბილისის პოლიციის დეპარტამენტის ისანი-სამგორის მთავარი სამმართველოს თანამშრომლებმა დიდი ოდენობით ქურდობის ფაქტზე ჩინეთის სახალხო რესპუბლიკის ორი მოქალაქე დააკავეს.

საგამოძიებო მოქმედებებით დადგინდა, რომ ბრალდებულებმა დანაშაული საჰაერო ხომალდზე ჩაიდინეს. ფრენის მიმდინარეობისას მათ ორ თანამგზავრს ფარულად მოჰპარეს კუთვნილი ფულადი სახსრები — საერთო ჯამში 7 800 ამერიკული დოლარი და 4 450 ევრო.

პოლიციამ ოპერატიულ-საგამოძიებო ღონისძიებები ცხელ კვალზე გაატარა, რის შედეგადაც სავარაუდო დამნაშავეები თბილისის საერთაშორისო აეროპორტის ტერიტორიაზევე აიყვანეს. სამართალდამცველებმა მოპარული თანხა სრულად ამოიღეს ნივთმტკიცების სახით.

მომხდარზე გამოძიება საქართველოს სისხლის სამართლის კოდექსის 177-ე მუხლის მე-4 ნაწილით მიმდინარეობს, რაც ქურდობას დამამძიმებელ გარემოებებში გულისხმობს და სასჯელის სახედ 10 წლამდე ვადით თავისუფლების აღკვეთას ითვალისწინებს.