სამტრედიაში „ახალის“ ოფისის გახსნისას მომხდარ ინციდენტზე პროკურატურამ 3 პირს ბრალი წაუყენა

საქართველოს პროკურატურამ სამტრედიაში მომხდარი ფიზიკური დაპირისპირების ფაქტზე სამ მოქალაქეს ოფიციალური ბრალდება წარუდგინა. საქმე ეხება 2024 წლის 11 აგვისტოს, წინასაარჩევნო კამპანიის მსვლელობისას მომხდარ ინციდენტს.

გამოძიების ინფორმაციით, პოლიტიკური გაერთიანება „ახალის“ ადგილობრივი ოფისის გახსნის ცერემონიალზე სულხან-საბა ნიკოლეიშვილმა თავის არეში დარტყმით ფიზიკური შეურაცხყოფა მიაყენა ნიკანორ მელიას. ამის შემდეგ, მელიას თანმხლებმა პირებმა — ცოტნე მირცხულავამ და გაბრიელ კობაიძემ საპასუხოდ იძალადეს ნიკოლეიშვილზე, რის შედეგადაც მან მსუბუქი ხარისხის დაზიანება მიიღო.

სამივე პირს ბრალდება სისხლის სამართლის კოდექსის 162¹ მუხლის პირველი ნაწილით წარედგინა, რაც წინასაარჩევნო აგიტაციისას განხორციელებულ ძალადობას გულისხმობს. აღნიშნული მუხლი სასჯელის სახედ ჯარიმას ან ორ წლამდე ვადით პატიმრობას ითვალისწინებს. საგამოძიებო უწყება სასამართლოს აღკვეთის ღონისძიების შეფარდების შუამდგომლობით კანონით დადგენილ ვადაში მიმართავს.