უკანონო ცეცხლსასროლი იარაღი და საბრძოლო მასალა: პოლიციამ 5 პირი დააკავა

შინაგან საქმეთა სამინისტროს თანამშრომლებმა დედაქალაქსა და რამდენიმე რეგიონში მასშტაბური საპოლიციო ღონისძიებები განახორციელეს. ოპერაციის შედეგად, ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვა-ტარების ბრალდებით, ხუთი მოქალაქე დააკავეს.

უწყების ცნობით, საგამოძიებო მოქმედებები თბილისის, ქვემო ქართლის, იმერეთის, შიდა ქართლისა და სამცხე-ჯავახეთის პოლიციის დეპარტამენტებმა ჩაატარეს. ბრალდებულების საცხოვრებელი სახლების, ავტომანქანებისა და პირადი ჩხრეკისას სამართალდამცველებმა სხვადასხვა ტიპის შეიარაღება აღმოაჩინეს.

პოლიციამ ნივთმტკიცების სახით ამოიღო ორი ავტომატური ცეცხლსასროლი იარაღი, სამი პისტოლეტი, ექვსი მჭიდი, მაყუჩი და 41 საბრძოლო ვაზნა.

მომხდარზე გამოძიება საქართველოს სისხლის სამართლის კოდექსის 236-ე მუხლით მიმდინარეობს, რაც ცეცხლსასროლი იარაღისა და საბრძოლო მასალის უკანონო ბრუნვას გულისხმობს. აღნიშნული დანაშაული 7 წლამდე ვადით თავისუფლების აღკვეთას ითვალისწინებს.