დიმიტრი ტატიშვილის სახალისო მოგონება: როგორ ეძგერა მსახიობი თეატრის დაკეტილ კარს

მსახიობი დიმიტრი ტატიშვილი თავისი კარიერის საწყის ეტაპს და მარჯანიშვილის თეატრში მუშაობის პირველ პერიოდს ხშირად იხსენებს ღიმილით. ერთ-ერთი ასეთი სახალისო შემთხვევა სწორედ იმ დროს გადახდა, როდესაც ახალბედა მსახიობი თეატრალურ ცხოვრებაში ახალი ფეხდგმული იყო.

როგორც ტატიშვილი ყვება, თეატრის ლეგენდარულ კოლორიტთან, გოგი გელოვანთან ერთად გამართული ხანგრძლივი ქეიფის შემდეგ, მეორე დილით ქუთაისელი მეგობარი ეწვია და სმა კვლავ გაგრძელდა. საღამოს კი მსახიობს რეპეტიცია ეგონა და თეატრში სასწრაფოდ გაეშურა.

თეატრთან მისულს შესასვლელი კარი დაკეტილი დახვდა. შეშინებულმა, რომ რეპეტიციაზე აგვიანებდა, კარს მთელი ძალღონით შეეჯახა. „გავიწიე და თხა და გიგოსავით ვეძგერე კარს. მალე ვიგრძენი, რომ თავიდან ოფლის გარდა, სისხლიც გადმომდიოდა“, — იხსენებს მსახიობი.

ხმაურზე ადგილზე მორიგე მილიციელი და თეატრის დარაჯი გამოჩნდნენ. სწორედ დარაჯისგან შეიტყო დასის ახალგაზრდა წევრმა, რომ იმ დღეს ორშაბათი იყო — თეატრის ოფიციალური დასვენების დღე, შესაბამისად, არანაირი რეპეტიცია არ იმართებოდა.