„ამ ომმა მამა წაგვართვა“ — შინდისის გმირის, ემზარ წილოსანის შვილის ემოციური მიმართვა

2008 წლის აგვისტოს ომიდან წლები გავიდა, თუმცა დაღუპული მებრძოლების ოჯახებისთვის ტკივილი განუზომელია. შინდისის გმირის, ემზარ წილოსანის ქალიშვილი, მარიამ წილოსანი სოციალურ ქსელში ემოციურ წერილს აქვეყნებს და ომში დაცემული მამის ხსოვნას იხსენებს.

მარიამ წილოსანი აღნიშნავს, რომ აგვისტოს ტრაგედია განსაკუთრებით მძიმეა იმ ოჯახებისთვის, რომლებმაც უახლოესი ადამიანები დაკარგეს. მისი თქმით, ეს თარიღი ზოგისთვის მხოლოდ ისტორიის ნაწილია, თუმცა მისთვის და მისი ძმისთვის უდიდესი პირადი ტრაგედიაა, რადგან ომმა მათ საყვარელი მამა წაართვა.

„მამას სიგიჟემდე უყვარდა თავისი ოჯახი, თუმცა როდესაც სამშობლოს დასჭირდა, საკუთარი სიცოცხლე ქვეყნის დაცვას შესწირა. მან იცოდა, რომ საქართველოს დაცვით ჩვენს მომავალსაც იცავდა,“ — წერს გმირის შვილი.

მარიამ წილოსანის თქმით, წლების სვლასთან ერთად მონატრება არ განელებულა, თუმცა მამის სახელი, ღირსება და თავდადება მათ მეხსიერებაში მარადიულად იცოცხლებს. მან ქედი მოიხარა ყველა იმ მებრძოლის ხსოვნის წინაშე, ვინც საქართველოს ერთიანობისთვის სიცოცხლე გაიღო.