ოზურგეთში წარმატებულ კურსდამთავრებულებს დააჯილდოებენ: ცნობილია ტენდერში გამარჯვებული

ოზურგეთის მუნიციპალიტეტში წარმატებული სკოლადამთავრებულების საპატივცემულოდ მასშტაბური საზეიმო ღონისძიება იგეგმება. სახელმწიფო შესყიდვების ეროვნული სააგენტოს ინფორმაციით, შესაბამის ტენდერში გამარჯვება შპს „გეოპროფმა“ მოიპოვა. კომპანია აღნიშნული ცერემონიის ორგანიზებას 55 800 ლარად უზრუნველყოფს.

საზეიმო შეხვედრა ქალაქ ოზურგეთის თეატრალურ მოედანზე ჩატარდება. ღონისძიება 2026 წლის 1-იდან 7 სექტემბრამდე პერიოდში, ერთ კონკრეტულ დღეს არის დაგეგმილი. დაჯილდოების მთავარი გმირები 112 ახალგაზრდა იქნება — 100 ოქროსმედალოსანი მოსწავლე და 12 აბიტურიენტი, რომლებმაც ეროვნულ გამოცდებზე მაღალი ქულები დააგროვეს. ღონისძიებას ასევე დაესწრებიან მათი მშობლები, მოწვეული სტუმრები და ადგილობრივი მცხოვრებლები.

აღსანიშნავია, რომ შპს „გეოპროფს“ ევალებოდა შეკვეთილში, „მუსიკოსთა პარკში“ ჩაის ფესტივალის ორგანიზებაც. თუმცა, ოზურგეთის მერიის ცნობით, უამინდობის გამო 9 აგვისტოსთვის დაგეგმილი ფესტივალის ჩატარება დროებით გადაიდო.