ქუთაისსა და წყალტუბოში 329 შეკვრა „მეთადონი“ ამოიღეს: დაკავებულია უცხო ქვეყნის 3 მოქალაქე

იმერეთში სამართალდამცველებმა მასშტაბური ოპერაცია ჩაატარეს, რის შედეგადაც უცხო ქვეყნის სამი მოქალაქე დააკავეს. შინაგან საქმეთა სამინისტროს ინფორმაციით, ბრალდებულებს განსაკუთრებით დიდი ოდენობით ნარკოტიკული საშუალების უკანონო შეძენა-შენახვა და წინასწარი შეთანხმებით ჯგუფის მიერ რეალიზაციის ხელშეწყობა ედებათ ბრალად.

გამოძიების მონაცემებით, დაკავებულები ჩართულნი იყვნენ ნარკოტიკების გასაღების დანაშაულებრივ სქემაში. ისინი აკრძალულ ნივთიერებებს ქუთაისსა და წყალტუბოში, სხვადასხვა სამალავში ათავსებდნენ, უღებდნენ ფოტოებს და კოორდინატებს ნარკოტიკით დაინტერესებულ პირებს უგზავნიდნენ.

პოლიციამ ბრალდებულების პირადი ჩხრეკისას და მათ მიერ მითითებული ლოკაციებიდან სარეალიზაციოდ გამზადებული 329 შეკვრა „მეთადონი“ ამოიღო. გარდა ამისა, ამოღებულია ნარკოტიკული საშუალებების დაფასოებისთვის საჭირო მასალები, რომლებიც დაკავებულების დროებითი საცხოვრებელი ბინებიდან ნივთმტკიცებად ამოიღეს.

მომხდარზე გამოძიება საქართველოს სისხლის სამართლის კოდექსის 260-ე და 260-ე კვარტა მუხლებით მიმდინარეობს, რაც სასჯელის სახედ 20 წლამდე ან უვადო თავისუფლების აღკვეთას ითვალისწინებს.