მამუკა მდინარაძე ალეკო ელისაშვილის საქმეზე TI-ის დასკვნას ეხმაურება

მამუკა მდინარაძე „საერთაშორისო გამჭვირვალობა-საქართველოს“ იმ ანგარიშს გამოეხმაურა, რომელიც ალეკო ელისაშვილის სისხლისსამართლებრივ დევნას ეხება. მმართველი გუნდის წარმომადგენლის თქმით, ის თავს შეიკავებს საკითხის სიღრმისეული შეფასებისა და სამართლებრივი კვალიფიკაციისგან, რადგან ოპოზიციონერ პოლიტიკოსს მის მიმართ სუბიექტური დამოკიდებულება აქვს.

როგორც მდინარაძემ აღნიშნა, ელისაშვილს შექმნილი აქვს შთაბეჭდილება, თითქოს მისი სამართლებრივი პასუხისმგებლობა თუ სავარაუდო დანაშაულებრივი ქმედებები სწორედ მდინარაძის ინსპირირებულია. მისი განცხადებით, ელისაშვილს რატომღაც ჰგონია, რომ უმრავლესობის ლიდერის ინტერესებში შედიოდა მისი გაქცევა, დანაშაულის ჩადენა, სასამართლოს შენობის დაზიანება თუ ტერორისტული აქტის განხორციელება.

ცნობისთვის, „საერთაშორისო გამჭვირვალობა-საქართველოს“ მიერ გავრცელებულ განცხადებაში ნათქვამია, რომ ალექსანდრე ელისაშვილის ქმედებებში ტერორიზმის ნიშნები არ იკვეთება. ორგანიზაციაში მიიჩნევენ, რომ მუხლის სიმკაცრე შესაძლოა პოლიტიკურად იყოს მოტივირებული, რათა ოპოზიციონერი ლიდერი სამაგალითოდ დასჯილიყო და ჩრდილი მიდგომოდა როგორც თავად მას, ისე მთლიანად პროდასავლურ ოპოზიციას.