სპეცოპერაცია იმერეთში: „ქურდულ სამყაროსთან“ კავშირში მყოფი 4 პირი დააკავეს

შინაგან საქმეთა სამინისტრომ, იმერეთის პოლიციის დეპარტამენტისა და პროკურატურის ერთობლივი ოპერაციის შედეგად, „ქურდულ სამყაროსთან“ კავშირის ბრალდებით ოთხი პირი დააკავა. სასამართლოს განჩინების საფუძველზე ჩატარებული ღონისძიებების ფარგლებში, კიდევ ორ პირს ბრალდება დაუსწრებლად წარედგინება.

საგამოძიებო უწყების ცნობით, ჩატარებული ფარული ოპერატიული მოქმედებებით დადგინდა, რომ ბრალდებულები იმერეთის რეგიონში ე.წ. „ქურდულ გარჩევებსა“ და კრიმინალურ შეკრებებში აქტიურად მონაწილეობდნენ.

გამოძიების მასალების თანახმად, ფიგურანტები დავებს კრიმინალური ტრადიციების მიხედვით წყვეტდნენ. იმ შემთხვევაში, თუ მხარეები დაკისრებულ ვალდებულებებს დროულად არ შეასრულებდნენ, მათ ფიზიკური ანგარიშსწორებით, ჯანმრთელობის დაზიანებითა და სიცოცხლის მოსპობით ემუქრებოდნენ.

სამართალდამცველებმა ბრალდებულების საცხოვრებელი სახლებისა და პირადი ჩხრეკისას ნივთმტკიცებად ამოიღეს კომპიუტერული ტექნიკა და მობილური ტელეფონები, რომლებსაც ისინი ერთმანეთთან კომუნიკაციისთვის იყენებდნენ.

საქმეზე გამოძიება საქართველოს სისხლის სამართლის კოდექსის 223-ე პრიმა, 223-ე ტერცია და 223-ე კვარტა მუხლებით მიმდინარეობს. ბრალის დამტკიცების შემთხვევაში, დაკავებულებს 15 წლამდე ვადით თავისუფლების აღკვეთა ემუქრებათ.