საჯავახო-ქობულეთის გზაზე 2.2 მილიონი ლარის ნაპირსამაგრი სამუშაოები მიმდინარეობს

საჯავახო-ჩოხატაური-ოზურგეთი-ქობულეთის შიდასახელმწიფოებრივი მნიშვნელობის საავტომობილო გზის 26-ე კილომეტრზე ინფრასტრუქტურული სამუშაოები აქტიურ ფაზაშია. მდინარე სუფსის მიერ შექმნილი საფრთხის თავიდან ასაცილებლად, აღნიშნულ მონაკვეთზე ნაპირსამაგრი ღონისძიებები ხორციელდება.

საქართველოს საავტომობილო გზების დეპარტამენტის ცნობით, პროექტის ფარგლებში შენდება თანამედროვე სტანდარტების რკინაბეტონის ნაპირსამაგრი კედელი, რაც გზის მდგრადობასა და გადაადგილების უსაფრთხოებას უზრუნველყოფს. აღნიშნული ზომები აუცილებელი გახდა მდინარის მიერ გზის სავალი ნაწილის დაზიანების რისკების გამო.

სარეაბილიტაციო პროექტი სრულად ფინანსდება სახელმწიფო ბიუჯეტიდან, ხოლო მისი ჯამური სახელშეკრულებო ღირებულება 2.2 მილიონ ლარს შეადგენს.