უკანონო თევზჭერა ზუგდიდში: გარემოსდაცვითმა ზედამხედველობამ ბრაკონიერობის ფაქტი გამოავლინა

გარემოსდაცვითი ზედამხედველობის დეპარტამენტის სამეგრელო-ზემო სვანეთის რეგიონულმა სამმართველომ ზუგდიდის მუნიციპალიტეტში ელექტროშოკური აპარატით თევზჭერის მორიგი უკანონო ფაქტი აღკვეთა.

უწყების ცნობით, ბრაკონიერობასთან ეფექტური ბრძოლა დეპარტამენტის ერთ-ერთ მთავარ პრიორიტეტს წარმოადგენს. ამ მიზნით, ინსპექტირების ეკიპაჟები მთელი ქვეყნის მასშტაბით 24-საათიან უწყვეტ რეჟიმში პატრულირებენ, რათა თავიდან იქნას აცილებული და დროულად გამოვლინდეს გარემოსდაცვითი კანონმდებლობის ნებისმიერი დარღვევა. პროცესში აქტიურად გამოიყენება თანამედროვე ტექნოლოგიური და სპეციალური მცურავი საშუალებები.

გარდა ამისა, დეპარტამენტი მყისიერად რეაგირებს სამინისტროს ცხელ ხაზზე (153) მოქალაქეებისგან შესულ თითოეულ შეტყობინებაზე. ოფიციალური მონაცემებით, მიმდინარე წლის მხოლოდ პირველ ექვს თვეში, სამეგრელო-ზემო სვანეთის ტერიტორიაზე უკანონო თევზჭერის სულ 40 ფაქტი გამოვლინდა.