ცვლილებები მძღოლებისთვის: ვიდეოჯარიმებზე ქულები ჩამოიჭრება და სიჩქარის ლიმიტი შემცირდება

საქართველოში საგზაო მოძრაობის წესების დარღვევასთან დაკავშირებით რეგულაციები მკაცრდება. მთავრობის მიერ დამტკიცებული ახალი ეროვნული სტრატეგიის ფარგლებში, განსაკუთრებული ყურადღება დაეთმობა სიჩქარის გადაჭარბების აღკვეთასა და მონიტორინგის თანამედროვე საშუალებების ეფექტურად გამოყენებას.

სიახლის თანახმად, იცვლება ვიდეოკამერების მიერ დაფიქსირებულ დარღვევებზე რეაგირების წესი. ვინაიდან არსებული მოდელი საკმარისად ეფექტური ვერ აღმოჩნდა, ავტომატური ფოტო-ვიდეოჯარიმების დროს მძღოლებს მართვის მოწმობიდან ქულების ჩამოჭრა დაიწყება. პარალელურად, შსს-ს „112“-ის ბაზაზე იგეგმება ვიდეოკონტროლის სისტემების გაფართოება, განსაკუთრებით მაღალი რისკის შემცველ საგზაო მონაკვეთებზე.

სტრატეგიის კიდევ ერთი მნიშვნელოვანი მიმართულება დასახლებულ პუნქტებში დაწესებული სიჩქარის ლიმიტებისა და ე.წ. „ტოლერანტობის ზღვრის“ გადახედვა-შემცირებაა. ამასთან ერთად, გაგრძელდება მუშაობა „შავი წერტილების“ — ავარიულად საშიში ადგილების იდენტიფიცირებასა და საგზაო ინფრასტრუქტურის გაუმჯობესებაზე.

ხელისუფლების განმარტებით, აღნიშნული ნაბიჯები მიზნად ისახავს ავტოსაგზაო შემთხვევების, გარდაცვლილთა და დაშავებულთა რაოდენობის მინიმუმამდე შემცირებას. გარდა ამისა, ახალი ინიციატივები ხელს შეუწყობს ჰაერისა და ხმაურის დაბინძურების შემცირებას, ასევე უზრუნველყოფს ქვეითთა და ორთვლიანი ტრანსპორტით გადაადგილებულთა უსაფრთხოებას.