სამაშველო ოპერაცია გურიაში: ტყეში ჩარჩენილი 6 მოქალაქე გადაარჩინეს

გურიაში, ჩოხატაურის მუნიციპალიტეტის სოფელ სურების მიმდებარედ, მასშტაბური სამაშველო ოპერაცია წარმატებით დასრულდა. საგანგებო სიტუაციების მართვის სამსახურის მეხანძრე-მაშველებმა ტყის მასივში ჩარჩენილი ექვსი მოქალაქე უსაფრთხო ადგილზე გაიყვანეს.

არსებული ინფორმაციით, მოქალაქეები რთული რელიეფის გამო ტყიდან გამოსვლას დამოუკიდებლად ვერ ახერხებდნენ. ვითარებას ართულებდა ისიც, რომ ჯგუფის ერთ-ერთ წევრს ჯანმრთელობის პრობლემა შეექმნა და გადაადგილების უნარი შეეზღუდა. შექმნილი საფრთხის გათვალისწინებით, ადგილზე დაუყოვნებლივ დაიგეგმა შესაბამისი ღონისძიებები.

დაშავებული პირის სწრაფი და უსაფრთხო ევაკუაციისთვის პროცესში სასაზღვრო პოლიციის ვერტმფრენი ჩაერთო. პაციენტი საჰაერო ტრანსპორტით სამედიცინო დაწესებულებაში გადაიყვანეს, სადაც მას შესაბამისი დახმარება უტარდება. დანარჩენი ხუთი მოქალაქის სიცოცხლესა და ჯანმრთელობას საფრთხე არ ემუქრება.