გომისმთის ტრაგედია და უპასუხისმგებლობა: ტატა ხვედელიანი საგზაო უსაფრთხოებაზე საუბრობს

გურიაში, გომისმთის მიმართულებით მომხდარ მძიმე ავტოსაგზაო შემთხვევას, რომელსაც ადამიანის სიცოცხლე ემსხვერპლა, პარტია „გახარია საქართველოსთვის“ ერთ-ერთი ლიდერი ტატა ხვედელიანი ეხმაურება. ოპოზიციონერი პოლიტიკოსის შეფასებით, აღნიშნული ტრაგედია კიდევ ერთხელ ადასტურებს, რომ სახელმწიფოსთვის საგზაო მოძრაობის უსაფრთხოების უზრუნველყოფა პრიორიტეტულ საკითხს არ წარმოადგენს.

ხვედელიანის თქმით, ქვეყანაში არსებული საგზაო პოლიტიკა სერიოზულ ხარვეზებს შეიცავს, ვინაიდან არ ხდება კანონმდებლობის ეფექტიანი აღსრულება და პრევენციული ღონისძიებების გატარება. მისი განცხადებით, სამგზავრო მიკროავტობუსების მონაწილეობით მძიმე ავარიები პერმანენტულ ხასიათს ატარებს, რაც სისტემური პრობლემის არსებობაზე მიუთითებს.

საკუთარ განცხადებაში პოლიტიკოსმა პარალელი გაავლო 2020 წელს შატილის გზაზე მომხდარ შემზარავ ავარიასთან, სადაც 17 ადამიანი დაიღუპა. მან ხაზი გაუსვა, რომ მიუხედავად იმ ტრაგედიის დროს გამოვლენილი უამრავი დარღვევისა — გაუმართავი ტექდათვალიერებისა და სამუხრუჭე სისტემისა, ქვეყანაში სამგზავრო გადაყვანების უსაფრთხოების კუთხით რეალური ცვლილებები არ განხორციელებულა.

„გაზრდილი ჯარიმები და დამატებული კამერები არ ნიშნავს ქმედით საგზაო პოლიტიკას, განსაკუთრებით მაშინ, როცა კანონის აღსრულება შერჩევითად ხდება. სამწუხაროდ, ვცხოვრობთ რეალობაში, სადაც ტრაგედიიდან ტრაგედიამდე ვარსებობთ და პასუხისმგებლობას არავინ იღებს“, — აცხადებს ტატა ხვედელიანი.