მოსალოდნელია უხვნალექიანობა და მეწყრული საფრთხე: გარემოს სააგენტოს გაფრთხილება

გარემოს ეროვნული სააგენტოს ცნობით, 13-იდან 15 აგვისტომდე საქართველოს მასშტაბით ამინდი მკვეთრად გაუარესდება. ქვეყნის უმეტეს ტერიტორიაზე მოსალოდნელია პერიოდული წვიმა, ზოგიერთ რაიონში კი უხვი ნალექი, ელჭექი, სეტყვა და ქარის გაძლიერებაა ნავარაუდევი.

სინოპტიკოსების პროგნოზით, 13-14 აგვისტოს ძლიერი ნალექია მოსალოდნელი აჭარაში, გურიაში, სამეგრელო-ზემო სვანეთში, რაჭა-ლეჩხუმსა და ქვემო სვანეთში, სამცხე-ჯავახეთში, ქვემო ქართლსა და კახეთში. 15 აგვისტოს კი უამინდობა ძირითადად ქვემო ქართლის, კახეთისა და მცხეთა-მთიანეთის რეგიონებს მოიცავს.

მოსალოდნელმა უხვმა წვიმებმა შესაძლოა მცირე მდინარეებზე წყლის დონის საგრძნობი მომატება და წყალმოვარდნები გამოიწვიოს. ამასთან, მთიან და გორაკ-ბორცვიან ზონებში არსებობს მეწყრულ-ღვარცოფული პროცესების ჩასახვისა და გააქტიურების საშუალო საფრთხე.