გზის რეაბილიტაცია მამათში: ადგილობრივები დაზიანებული მონაკვეთების აღდგენას ითხოვენ

ლანჩხუთის მუნიციპალიტეტში სტიქიით მიყენებული ზიანის აღმოფხვრა და საგზაო ინფრასტრუქტურის რეაბილიტაცია აქტიურ ფაზაშია. მიუხედავად იმისა, რომ სოფელ მამათში სარეაბილიტაციო სამუშაოები უკვე დაწყებულია, ადგილობრივი მცხოვრებლების ნაწილი აცხადებს, რომ ყურადღება ყველა პრობლემურ მონაკვეთს თანაბრად არ ეთმობა.

ადგილობრივი ხელისუფლების ცნობით, მუნიციპალიტეტში მიმდინარე ინფრასტრუქტურულ პროექტებს ლანჩხუთის მერი ალექსანდრე სარიშვილი, მისი მოადგილე თორნიკე ტიკაძე და საკრებულოს თავმჯდომარე ბესიკ ტაბიძე პირადად გაეცნენ. სოფელ მამათის გზის აღდგენითი პროექტი რეგიონებში განსახორციელებელი პროექტების ფონდიდან 1 390 000 ლარით დაფინანსდა. მუნიციპალიტეტის ხელმძღვანელობის განცხადებით, შიდა საუბნო გზების მოწესრიგება მათთვის პრიორიტეტული მიმართულებაა.

ამ ფონზე, სოფლის მოსახლეობის ნაწილი განსაკუთრებულ ყურადღებას ამახვილებს კაპროვანი-კონჭკათის უბნების დამაკავშირებელ მონაკვეთზე. ადგილობრივების თქმით, სტიქიის შედეგად გზა იმდენად დაზიანდა, რომ ტრანსპორტით გადაადგილება შეუძლებელი გახდა, ხოლო საცალფეხო ბილიკიც კი თითქმის აღარ არსებობს.

როგორც მამათის მცხოვრებლები აღნიშნავენ, აღნიშნული გზა, რომელსაც ისტორიულად „ნესტორ მალაზონიას გზას“ უწოდებდნენ, გასული საუკუნის 70-იან წლებში შეიქმნა და მას სოფლისთვის უდიდესი აგრარული და ლოგისტიკური მნიშვნელობა ჰქონდა. ადგილობრივები მერიას მოუწოდებენ, სპეციალური კომისია გამოყოს და ეს მონაკვეთიც ჩართოს სარეაბილიტაციო ბიუჯეტში.

საკითხთან დაკავშირებით განმარტება გააკეთა მამათის მაჟორიტარმა დეპუტატმა ლანჩხუთის საკრებულოში, გელა პატეიშვილმა. მისი თქმით, კაპროვანი-კონჭკათის გზის აღდგენა დაგეგმილია, თუმცა სამუშაოების დაწყების კონკრეტული ვადები ამ ეტაპზე უცნობია. შესაბამისად, სანამ პროექტი იდეის დონეზე რჩება, ადგილობრივ მოსახლეობას დაზიანებულ მონაკვეთზე გადაადგილება კვლავ სერიოზულ პრობლემად ექცევა.