3 ოქტომბერს ოთხ მუნიციპალიტეტში საკრებულოს შუალედური არჩევნები გაიმართება

მიმდინარე წლის 3 ოქტომბერს საქართველოს ოთხ მუნიციპალიტეტში — ვანში, წალკაში, დმანისსა და ახმეტაში საკრებულოს შუალედური არჩევნები ჩატარდება. აღნიშნულ ინფორმაციას ცენტრალური საარჩევნო კომისია ავრცელებს.

ცესკოს განმარტებით, რიგგარეშე საარჩევნო პროცესის ჩატარება მას შემდეგ გახდა აუცილებელი, რაც ადგილობრივი თვითმმართველობის მაჟორიტარ დეპუტატებს უფლებამოსილება ვადაზე ადრე შეუწყდათ.

საარჩევნო ადმინისტრაციის მონაცემებით, ვანის საკრებულოში მანდატი ბექა ლაჭყებიანს შეუწყდა, წალკის მუნიციპალიტეტში — რამაზ ხინიკაძეს, დმანისში — ილიას სარსევანიძეს, ხოლო ახმეტის საკრებულოში — ადამ მოზაიძეს. სწორედ აღნიშნულ ოლქებში გამოთავისუფლებულ ადგილებს დაიკავებენ 3 ოქტომბერს არჩეული ახალი დეპუტატები.