თბილისში ჯგუფური გამოძალვის ბრალდებით 3 პირი დააკავეს – შსს-ს დეტალები

თბილისში, ჯგუფური გამოძალვის ფაქტზე სამი პირი დააკავეს. შინაგან საქმეთა სამინისტროს ცნობით, თბილისის პოლიციის დეპარტამენტის ძველი თბილისის მთავარი სამმართველოს თანამშრომლებმა ინტენსიური ოპერატიულ-საგამოძიებო მოქმედებების შედეგად, ბრალდებულები ცხელ კვალზე დააკავეს.

გამოძიებით დადგინდა, რომ დაკავებულები, ცივი იარაღის გამოყენების მუქარით, ორ მოქალაქეს აიძულებდნენ სხვადასხვა ბანკიდან ონლაინ სესხების აღებას. დანაშაულებრივი ჯგუფის წევრებმა ერთ-ერთი დაზარალებულის მიერ აღებული დამტკიცებული თანხა სრულად გამოატანინეს და უკანონოდ მიითვისეს.

სამართალდამცველებმა, დაკავების ოპერაციის ფარგლებში, ბრალდებულებისგან უკანონოდ მითვისებული თანხის ნაწილი ნივთმტკიცებად ამოიღეს, რაც საქმის მასალებს დაერთვება.

შინაგან საქმეთა სამინისტრო აცხადებს, რომ გამოძიება გრძელდება დანაშაულში მონაწილე სხვა პირების იდენტიფიცირებისა და პასუხისგებაში მიცემის მიზნით. საქმე აღძრულია საქართველოს სისხლის სამართლის კოდექსის 181-ე მუხლით, რაც ჯგუფურ გამოძალვას გულისხმობს და შვიდ წლამდე თავისუფლების აღკვეთას ითვალისწინებს.