ირაკლი კობახიძე ღარიბაშვილის განცხადებაზე: „ძალიან პრობლემურია თავისთვის“ – ეთიკური სტანდარტები და ივანიშვილთან კომუნიკაცია

საქართველოს პრემიერ-მინისტრმა, ირაკლი კობახიძემ, პატიმრობაში მყოფი ყოფილი პრემიერ-მინისტრის, ირაკლი ღარიბაშვილის ბოლოდროინდელ განცხადებას "ძალიან პრობლემური" უწოდა, თუმცა ხაზგასმით აღნიშნა, რომ ეს პრობლემა თავად ღარიბაშვილს ეხება და არა ხელისუფლებას. კობახიძემ ჟურნალისტებთან საუბარში განაცხადა, რომ ეთიკური სტანდარტებიდან გამომდინარე, ამ საკითხზე დამატებით კომენტარს არ გააკეთებს.

პრემიერის თქმით, მისი წინამორბედის განცხადებაზე კომენტარის გაკეთება მისთვის ეთიკურად მიუღებელია, რადგან ღარიბაშვილი მასზე ადრე იკავებდა მთავრობის მეთაურის თანამდებობას. კობახიძემ ასევე აღნიშნა, რომ ირაკლი ღარიბაშვილის საქმეზე კონკრეტული განაჩენი უკვე დამდგარია და "დანარჩენი მთლიანად სამართალდამცავი ორგანოების საქმეა".

„ეს განცხადება ვნახე, თუმცა ვერ ვიტყვი, რაზეა საუბარი. ერთი რამ ცხადია – არსებობს დამდგარი განაჩენი, დანარჩენი კი სამართალდამცავ სტრუქტურებს ეხება. ჩემთვის ეთიკურად არასწორია მისი ნათქვამის შეფასება, რადგან ის ჩემამდე იყო ამ თანამდებობაზე. არსებობს ეთიკური სტანდარტები, რომლებიც მიზღუდავს ამ თემაზე საჯარო მსჯელობის შესაძლებლობას,“ – განმარტა ირაკლი კობახიძემ.

ჟურნალისტების შეკითხვაზე, ჰქონდა თუ არა მას კომუნიკაცია „ქართული ოცნების“ დამფუძნებელ ბიძინა ივანიშვილთან ღარიბაშვილის წერილის გამოქვეყნების შემდეგ, პრემიერ-მინისტრმა დაადასტურა კონტაქტი, თუმცა დააზუსტა, რომ აღნიშნული საკითხი არ განუხილავთ. „კომუნიკაცია გუშინ გვქონდა სხვადასხვა საკითხთან დაკავშირებით. ზუსტად არ მახსოვს, წერილის გამოქვეყნების შემდეგ იყო თუ მანამდე. ეს საკითხი ჩვენ არ განგვიხილავს, ამაზე არ გვიმსჯელია,“ – განაცხადა კობახიძემ.

შეგახსენებთ, რომ პატიმრობაში მყოფმა ყოფილმა პრემიერ-მინისტრმა ირაკლი ღარიბაშვილმა განცხადება გაავრცელა, რომელშიც ნათქვამია, რომ „დღეიდან მისი და მისი ოჯახის უსაფრთხოებაზე სრული პასუხისმგებლობა ეკისრება ბიძინა ივანიშვილს და მთელ ხელისუფლებას“. ღარიბაშვილი ასევე აცხადებს, რომ ხვალ, 18 აგვისტოს, საზოგადოებას ვრცელ წერილს შესთავაზებს, სადაც „სიმართლეს იტყვის“.

მისი განცხადების თანახმად, მას სხვა გზა არ დაუტოვეს, გარდა იმისა, რომ წინ აღუდგეს „ღირსების შემლახავ ბოროტებას“, „დაუნდობელ სისასტიკეს“, „ჩაგვრას/უსამართლობას“ და „მისი და მისი ოჯახის განადგურების ბინძურ გეგმას“. ამ განცხადებით, ირაკლი ღარიბაშვილი ღიად მიანიშნებს ზეწოლაზე და საფრთხეებზე, რომლის წინაშეც, მისი თქმით, ის და მისი ოჯახი დგანან.