პოლონეთი ქართველებისთვის დასაქმების წესებს ამკაცრებს – გეგელია დემოგრაფიულ კატასტროფაზე

პოლონეთმა საქართველოს მოქალაქეებისთვის, ისევე როგორც კოლუმბიისა და ვენესუელის წარმომადგენლებისთვის, ქვეყანაში დასაქმების მიზნით შესვლის რეგულაციები მნიშვნელოვნად გაამკაცრა. ეს გადაწყვეტილება, რომელიც 10 აგვისტოს საგარეო საქმეთა მინისტრმა რადოსლავ სიკორსკიმ მოაწერა ხელი და ძალაში შაბათს შევიდა, უშუალოდ პოლონეთში სამუშაოდ ჩასულ პირებს შეეხება.

„ლელო-ძლიერი საქართველოს“ ერთ-ერთი ლიდერი, გრიგოლ გეგელია, აღნიშნულ ნაბიჯს „დემოგრაფიული კატასტროფის ნათელ დასტურად“ აფასებს, რაშიც, მისი თქმით, „ქართულმა ოცნებამ“ სახელმწიფო და ხალხი ჩააგდო. გეგელიას განცხადება „ინტერპრესნიუსმა“ გაავრცელა.

პოლიტიკოსი ხაზს უსვამს, რომ პოლონეთი საქართველოსთვის ძვირფასი მეგობარი და პარტნიორი ქვეყანაა, თუმცა, მისი აზრით, მსგავსი ზომების მიღება „ქართული ოცნების“ „მტრული, ანტიქართული პოლიტიკის“ პირდაპირი გამოძახილია, რომელმაც ქვეყანაში მძიმე ფონი შექმნა.

პოლონეთის მთავრობის განმარტებით, აღნიშნული სამი ქვეყნის მოქალაქეები სისტემატურად იყენებდნენ უვიზო მიმოსვლის რეჟიმს არალეგალური დასაქმებისთვის, კანონიერი მოთხოვნების დაკმაყოფილების გარეშე. ოფიციალური პირები მიზეზად ასახელებენ არალეგალურ დასაქმებას, ქვეყანაში უკანონოდ დარჩენას, ჩრდილოვანი ეკონომიკის ზრდას, დასაქმებულთა ექსპლუატაციას და ადამიანებით ვაჭრობას.

ვარშავაში ასევე აღნიშნავენ, რომ საქართველო, კოლუმბია და ვენესუელა მაღალი მიგრაციული რისკის მქონე ქვეყნებად არიან მიჩნეულნი, რაც მათი გადაწყვეტილების ერთ-ერთი მთავარი განმაპირობებელი ფაქტორი გახდა.