მარნეულში სწრაფი ჩარიცხვის აპარატის ქურდობისთვის ორი პირი დააკავეს – შსს

შინაგან საქმეთა სამინისტროს თანამშრომლებმა ქვემო ქართლში, კერძოდ მარნეულის მუნიციპალიტეტში, სწრაფი ჩარიცხვის აპარატის ქურდობის ფაქტზე ორი პირი დააკავეს. გამოძიებით დგინდება, რომ ბრალდებულებმა დანაშაული წინასწარ შეთანხმებით, ჯგუფურად ჩაიდინეს.

შსს-ს ინფორმაციით, ბრალდებულები საკუთარი ავტომობილით გადაადგილდებოდნენ, რა დროსაც მარნეულის ერთ-ერთი სოფლის სავაჭრო ობიექტის გარე პერიმეტრზე განთავსებული სწრაფი გადახდის ტერმინალი მოიპარეს. მათ უკანონოდ დაეუფლნენ აპარატში არსებულ თანხას, ხოლო დაზიანებული ტერმინალი შემთხვევის ადგილიდან მოშორებით გადააგდეს და მიიმალნენ.

გამოძიების ფარგლებში ასევე გამოიკვეთა, რომ ერთ-ერთმა დაკავებულმა, დანაშაულის კვალის დაფარვის მიზნით, თანასოფლელის კუთვნილი ავტომობილის სანომრე ნიშანი მოიპარა და საკუთარ მანქანაზე დაამაგრა.

სამართალდამცველებმა ეფექტური ოპერატიული და საგამოძიებო მოქმედებების შედეგად ბრალდებულები მომხდარიდან რამდენიმე საათში დააკავეს. ნივთმტკიცებად ამოღებულია მოპარული ჩასარიცხი აპარატი და ასევე ავტომობილის სანომრე ნიშანი.

გამოძიება საქართველოს სისხლის სამართლის კოდექსის 177-ე მუხლის მეორე და მესამე ნაწილებით მიმდინარეობს, რაც ჯგუფურად ჩადენილ ქურდობას გულისხმობს და 7 წლამდე ვადით თავისუფლების აღკვეთას ითვალისწინებს.