რუსთაველის გამზირზე არქეოლოგიური აღმოჩენები: მერიის განცხადება და სამუშაოების გეგმა

თბილისის ცენტრალურ ნაწილში, რუსთაველის გამზირზე მიმდინარე სარეაბილიტაციო სამუშაოებმა მოულოდნელი არქეოლოგიური აღმოჩენები გამოიწვია. დედაქალაქის მერია ოფიციალურ განცხადებას ავრცელებს იმ ფაქტთან დაკავშირებით, რომ მეტროსადგურ „თავისუფლების მოედანსა“ და საქართველოს ეროვნულ მუზეუმს შორის არსებულ მონაკვეთზე, მიწისქვეშა სამუშაოების დროს, უძველესი აგურის წყობები და კერამიკული ჭურჭელი იქნა აღმოჩენილი.

მერიის განმარტებით, მსგავსი ინფრასტრუქტურული პროექტების განხორციელებისას, როდესაც არქეოლოგიური ფენები ან ისტორიული არტეფაქტები ვლინდება, თბილისის მუნიციპალიტეტი მჭიდროდ თანამშრომლობს საქართველოს კულტურული მემკვიდრეობის დაცვის ეროვნულ სააგენტოსთან. ყველა შემდგომი გადაწყვეტილება მიიღება სწორედ სააგენტოს მიერ გაცემული რეკომენდაციების საფუძველზე, რაც უზრუნველყოფს კულტურული მემკვიდრეობის სათანადო დაცვას.

როგორც განცხადებაშია აღნიშნული, რუსთაველის გამზირზე გამოვლენილი არქეოლოგიური მასალის შესახებ ინფორმაცია დაუყოვნებლივ მიეწოდა კულტურული მემკვიდრეობის დაცვის ეროვნულ სააგენტოს. შეტყობინების მიღებისთანავე, სააგენტოს შესაბამისმა სპეციალისტებმა ოპერატიულად მოახდინეს რეაგირება – ადგილზე შეისწავლეს აღმოჩენილი ობიექტები და მოამზადეს დეტალური რეკომენდაციები სამუშაოების შემდგომი წარმართვისთვის.

დედაქალაქის მერია ხაზგასმით აცხადებს, რომ რუსთაველის გამზირის აღნიშნულ მონაკვეთზე სარეაბილიტაციო პროცესი სწორედ სააგენტოს მიერ გაცემული მითითებებისა და რეკომენდაციების სრული დაცვით გაგრძელდება, რათა არ დაზიანდეს ისტორიული ფასეულობა და სათანადოდ მოხდეს მისი შესწავლა-დაცვა.