სუხიშვილები ქუთაისში: საქართველოს ბანკის კამპანია ქართული ცეკვის ფესვებთან დასაბრუნებლად

ქართული ნაციონალური ბალეტი „სუხიშვილები“ გრანდიოზულ კონცერტს გამართავს ქუთაისში. ღონისძიება, რომელიც 8 სექტემბერს, საღამოს 7 საათზეა დაგეგმილი, საქართველოს ბანკის ინიციატივითა და გენერალური სპონსორობით ხორციელდება. ეს არის ფართომასშტაბიანი კამპანიის ნაწილი, რომლის მიზანია ქართული ცეკვის სული და ისტორია დაუბრუნოს მის ფესვებს – საქართველოს რეგიონებს.

„სუხიშვილების“ თითოეული ნომერი ქართული კულტურის უნიკალურ ნაწილს წარმოადგენს, რომელიც აერთიანებს ქვეყნის სხვადასხვა კუთხის ისტორიას, ხასიათსა და ტრადიციებს. ქართული ცეკვის მოძრაობები, თავისი არსით, სწორედ საქართველოს ყოველდღიურობიდან, შრომიდან და ბუნებიდან იღებს სათავეს, შემდეგ კი სცენაზე ცოცხლდება და მაყურებელს დაუვიწყარ ემოციებს ჩუქნის. ახლა კი, ამ კამპანიის ფარგლებში, ეს ძირძველი ისტორიები ქუთაისის სცენაზე გაცოცხლდება.

კამპანიის მთავარი იდეა „სუხიშვილების“ იმ ადგილებში დაბრუნებაა, სადაც ქართული ცეკვის ნამდვილი ფესვებია. ეს არის გზავნილი, რომ ქართული შემოქმედება არასდროს ჩერდება და სცენა, რომელიც მთელ საქართველოს ეკუთვნის, ყველასთვის ხელმისაწვდომი უნდა იყოს.

კონცერტზე დასასწრები ბილეთების გაყიდვა 20 აგვისტოდან დაიწყება. მსურველებს საშუალება ექნებათ შეიძინონ ბილეთები და გახდნენ ამ ისტორიული მოვლენის მონაწილენი.