ბახმაროს დოღზე 6 წლის ბავშვი დაშავდა – პატარა ჩოხატაურის კლინიკაში გადაიყვანეს

გურიის მაღალმთიან კურორტ ბახმაროში, ტრადიციული დოღის მიმდინარეობისას, სამწუხარო ინციდენტი მოხდა — დაშავდა 6 წლის ბავშვი. ინფორმაცია მომხდარის შესახებ სწრაფად გავრცელდა სოციალურ ქსელებში, რამაც საზოგადოების ყურადღება მიიქცია.

როგორც „გურია ნიუსს“ ჩოხატაურის სასწრაფო დახმარების ბრიგადაში დაუდასტურეს, დაშავებული პატარა სასწრაფოდ იქნა გადაყვანილი სამედიცინო დაწესებულებაში. მედიკოსების განცხადებით, ბავშვი ამჟამად ჩოხატაურში მდებარე კლინიკა „მედალფაშია“ მოთავსებული.

„ბახმაროდან ჩოხატაურის „მედალფაში“ ბავშვის ტრანსპორტირება უმოკლეს დროში და ყოველგვარი გართულების გარეშე მოხერხდა. პაციენტი ამ წუთებშიც კლინიკაში იმყოფება“, — განმარტეს ჩოხატაურის სასწრაფო დახმარების ცენტრის წარმომადგენლებმა.