ქორეოგრაფს არასრულწლოვნების გარყვნისთვის 11 წელი მიესაჯა – სასამართლოს განაჩენი

სენაკის რაიონულმა სასამართლომ მკაცრი განაჩენი გამოუტანა ქორეოგრაფს, რომელიც არასრულწლოვანი მოსწავლეების მიმართ გარყვნილ ქმედებებში იყო ბრალდებული. სასამართლომ სრულად გაიზიარა პროკურატურის მიერ წარდგენილი მტკიცებულებები და ბრალდებული დამნაშავედ ცნო, რის შედეგადაც მას 11 წლით თავისუფლების აღკვეთა განესაზღვრა.

როგორც საქართველოს პროკურატურა იუწყება, გამოძიებამ, რომელიც შინაგან საქმეთა სამინისტრომ აწარმოა, დაადგინა, რომ კერძო საცეკვაო სტუდიის დამფუძნებელი და პედაგოგი, სულ მცირე, სამ არასრულწლოვან მოსწავლესთან მიმართებაში ბოროტად იყენებდა საკუთარ ნდობისა და ავტორიტეტულ მდგომარეობას. დანაშაულებრივი ქმედებები ჩადენილი იყო 14 წლამდე ასაკის პირების მიმართ.

კერძოდ, დადგენილია, რომ 17 მარტს, ქორეოგრაფმა ერთ-ერთი მოსწავლის მიმართ განახორციელა გარყვნილი ქმედება. გარდა ამისა, გამოძიებით გამოვლინდა, რომ ანალოგიური ხასიათის დანაშაულები მან ჩაიდინა 2021 წლის თებერვალსა და 2023 წლის ოქტომბერშიც, ორი სხვა მოსწავლის მიმართ.

სამართალდამცველებმა ბრალდებული პირი 17 მარტს დააკავეს. მას ბრალდება წარედგინა საქართველოს სისხლის სამართლის კოდექსის 141-ე მუხლის მეორე ნაწილის „ვ” და „ზ” ქვეპუნქტებით, ასევე 138-ე მუხლის მესამე ნაწილის „ბ” და მეოთხე ნაწილის „ა” ქვეპუნქტებით, რაც არასრულწლოვანთა მიმართ გარყვნილ ქმედებებსა და სექსუალური ხასიათის სხვა დანაშაულებს გულისხმობს. აღკვეთის ღონისძიების სახით მას პატიმრობა შეეფარდა.

სასამართლოს საბოლოო გადაწყვეტილებით, აღნიშნული ქმედებებისთვის ქორეოგრაფს კანონით გათვალისწინებული უმკაცრესი სასჯელი, 11 წლით თავისუფლების აღკვეთა შეეფარდა.