თიბისი და Standard Chartered Bank: საერთაშორისო გადახდები საქართველოში ახალ ეტაპზე გადადის

ქართული საბანკო სექტორის ლიდერი, თიბისი, მომხმარებლებისთვის სერვისების ხარისხისა და სისწრაფის გაუმჯობესების მიზნით, ახალ მნიშვნელოვან თანამშრომლობას იწყებს. ბანკმა საკორესპონდენტო პარტნიორობის შესახებ შეთანხმებას მიაღწია მსოფლიოს ერთ-ერთ წამყვან ფინანსურ ინსტიტუტთან, Standard Chartered Bank-თან. ეს ნაბიჯი მნიშვნელოვნად დააჩქარებს და გაამარტივებს საერთაშორისო გადახდების პროცესს საქართველოში, რაც განსაკუთრებით ხელსაყრელი იქნება ბიზნეს სექტორისთვის.

Standard Chartered Bank აღიარებულია, როგორც გლობალური საბანკო გიგანტი, რომელიც ფლობს ფართო საერთაშორისო ქსელს და მყარ პოზიციებს იკავებს საკორესპონდენტო ბანკინგისა და საერთაშორისო ტრანზაქციების სფეროში. შესაბამისად, თიბისისთან მისი პარტნიორობა უდიდეს სარგებელს მოუტანს იმ ქართულ კომპანიებს, რომლებიც აქტიურად არიან ჩართულნი საგარეო ეკონომიკურ საქმიანობაში. ეს ეხება როგორც იმპორტ-ექსპორტის ოპერაციებს, ისე ნებისმიერ ტრანზაქციას უცხოელ პარტნიორებთან.

თიბისის ვაჭრობის ფინანსირებისა და ფაქტორინგის დეპარტამენტის დირექტორის, თამარ ხიზანიშვილის განცხადებით, ბანკი მუდმივად ორიენტირებულია მომხმარებლის მოთხოვნილებებზე და ქმნის ინოვაციურ სერვისებს მათი ყოველდღიური საქმიანობის გასამარტივებლად. „თანამედროვე და მოქნილი საბანკო ინფრასტრუქტურა კრიტიკულად მნიშვნელოვანია ბიზნესისთვის ფინანსური ოპერაციების უწყვეტად განსახორციელებლად. Standard Chartered Bank-თან გაფორმებული საკორესპონდენტო პარტნიორობა სწორედ ამ მიზანს ემსახურება. ეს თანამშრომლობა ხელს შეუწყობს საერთაშორისო ვაჭრობის შეუფერხებელ წარმართვას, გააძლიერებს ბიზნეს აქტივობას საქართველოში და მნიშვნელოვან წვლილს შეიტანს ქვეყნის ეკონომიკის განვითარებაში. საერთაშორისო საბანკო ინსტიტუტთან ურთიერთობის დაწყება თიბისისთვის კიდევ ერთი წინ გადადგმული ნაბიჯია გლობალური შესაძლებლობების გაფართოებისა და საკორესპონდენტო ქსელის შემდგომი განვითარების გზაზე“, – აღნიშნა მან.

ამ პარტნიორობის მეშვეობით, თიბისი კიდევ უფრო ამტკიცებს თავის პოზიციას, როგორც ბიზნესის #1 პარტნიორი, რომელიც მუდმივად ზრუნავს ქართული კომპანიების კონკურენტუნარიანობის ამაღლებაზე საერთაშორისო ასპარეზზე.