სასკოლო ფორმების შეძენა გაადვილდება: ფიზიკური პუნქტები და ონლაინ პლატფორმა ქეშბექით

საქართველოს განათლების, მეცნიერებისა და ახალგაზრდობის სამინისტრო სასკოლო ფორმების შეძენის ახალ, გაუმარტივებულ სისტემას ნერგავს. როგორც უწყების ხელმძღვანელმა, გივი მიქანაძემ განაცხადა, მოსწავლის ფორმების ხელმისაწვდომობის გაზრდის მიზნით, ქვეყნის მასშტაბით როგორც ფიზიკური სარეალიზაციო წერტილები, ისე ონლაინ პლატფორმა ამოქმედდება.

მინისტრის განმარტებით, საქართველოს ყველა ქალაქსა და მუნიციპალიტეტში, სულ მცირე, ერთი სპეციალიზებული მაღაზია გაიხსნება, სადაც მშობლებს საშუალება ექნებათ, უშუალოდ მივიდნენ და შვილებისთვის სასკოლო ფორმები შეიძინონ. ამ ობიექტების შესახებ დეტალური ინფორმაცია მომავალი კვირიდან გახდება ცნობილი.

პარალელურად, მომავალი კვირიდან ამოქმედდება ციფრული პლატფორმაც, რომელიც მშობლებს საშუალებას მისცემს, სასურველი ფორმები ონლაინ რეჟიმში, სახლიდან გაუსვლელად შეუკვეთონ. ეს ინიციატივა მიზნად ისახავს შეძენის პროცესის მაქსიმალურად გამარტივებას და დროის დაზოგვას.

გივი მიქანაძემ ასევე ხაზი გაუსვა საბანკო სექტორთან თანამშრომლობას. მისი თქმით, როგორც ფიზიკური, ისე ონლაინ შესყიდვების შემთხვევაში, გათვალისწინებულია სხვადასხვა ბანკის მიერ შეთავაზებული საშეღავათო „ქეშბექ“ პოლიტიკა. ამ აქციების დეტალები საზოგადოებას უახლოეს პერიოდში გაეცნობა.