საქართველოს ბანკი Global Finance-ის 33 ჯილდოს მფლობელი გახდა: ციფრული ბანკინგის ლიდერი რეგიონში

საქართველოს ბანკმა მორიგი მნიშვნელოვანი საერთაშორისო აღიარება მოიპოვა. გავლენიანმა გამოცემა Global Finance-მა 2026 წლის „მსოფლიოს საუკეთესო ციფრული ბანკების“ დაჯილდოების პირველი ეტაპის გამარჯვებულები დაასახელა, სადაც საქართველოს ბანკი 33 ჯილდოს მფლობელი გახდა. ეს გამარჯვებები მოიცავს როგორც ქვეყნის, ისე ცენტრალური და აღმოსავლეთ ევროპის რეგიონის მასშტაბით მიღწევებს, რაც ბანკის ციფრული სერვისების უმაღლეს ხარისხზე მეტყველებს.

დაჯილდოების ფარგლებში, საქართველოს ბანკი განსაკუთრებით აღინიშნა ცენტრალურ და აღმოსავლეთ ევროპაში საუკეთესო მობილბანკად და ყველაზე ინოვაციურ სამომხმარებლო ციფრულ ბანკად. გარდა ამისა, ბანკმა ჯილდოები მიიღო ონლაინ პროდუქტების შეთავაზების, პერსონალიზებული დაკრედიტების, სოციალური მედია მარკეტინგის ეფექტურობისა და სხვა მრავალი მიმართულებით, რაც ხაზს უსვამს მისი ციფრული ეკოსისტემის მრავალფეროვნებასა და სრულყოფილებას.

გამარჯვებულების შერჩევის პროცესი მკაცრი და მრავალეტაპიანი იყო. საწყის ეტაპზე კანდიდატები შეაფასა გლობალური საკონსულტაციო-ტექნოლოგიური კომპანია Infosys-ის ჟიურიმ. საბოლოო სია Global Finance-ის რედაქტორებმა გამოავლინეს ისეთი კრიტერიუმების საფუძველზე, როგორიცაა მომხმარებლების მოზიდვისა და ციფრული მომსახურების სტრატეგიის სიძლიერე, ციფრული შეთავაზებების წარმატებით გამოყენება, მომხმარებელთა რაოდენობის ზრდა ციფრულ არხებში, პროდუქტების ფართო არჩევანი, ვებგვერდისა და მობილური აპლიკაციის დიზაინი და ფუნქციონალურობა, ასევე სხვა მიღწეული შედეგები.

„ციფრული ბანკინგი დღეს ფინანსური სექტორის ქვაკუთხედია. ხელოვნური ინტელექტის, ავტომატიზაციისა და მონაცემთა ანალიტიკის განვითარებასთან ერთად, მომხმარებლების მოლოდინები მუდმივად იზრდება – მათ სურთ უფრო სწრაფი, პერსონალიზებული და შეუფერხებელი ციფრული გამოცდილება. ამასთან, ბანკებისთვის სასიცოცხლოდ მნიშვნელოვანია უსაფრთხოების, მდგრადობისა და რეგულაციებთან შესაბამისობის გაძლიერება. Global Finance-ის 2026 წლის მსოფლიოს საუკეთესო ციფრული ბანკების დაჯილდოება სწორედ იმ ფინანსურ ინსტიტუტებს გამოარჩევს, რომლებიც ციფრულ საბანკო მომსახურებაში ახალ სტანდარტებს ადგენენ“, – განაცხადა ჯოზეფ ჯიარაპუტომ, Global Finance-ის დამფუძნებელმა და რედაქტორმა, ხაზგასმით აღნიშნა რა ციფრული ტრანსფორმაციის მნიშვნელობა.

საქართველოს ბანკის მიერ მოპოვებული ჯილდოები მოიცავს როგორც სამომხმარებლო, ისე ბიზნეს სეგმენტებს, როგორც საქართველოს, ისე ცენტრალური და აღმოსავლეთ ევროპის რეგიონში, რაც კიდევ ერთხელ ადასტურებს მის წამყვან პოზიციას ფინანსურ ინდუსტრიაში.