შსს-მ 4 კგ „ალფა-პვპ“-ის გავრცელების მცდელობა აღკვეთა – დაკავებულია უცხოელი

საქართველოს შინაგან საქმეთა სამინისტრომ მასშტაბური ნარკოდანაშაული აღკვეთა. სამართალდამცველებმა ოთხ კილოგრამამდე განსაკუთრებით საშიში ნარკოტიკული საშუალება „ალფა-პვპ“-ის ქვეყანაში გავრცელების მცდელობა გააუვნებელყვეს. ოპერაციის შედეგად, უცხო ქვეყნის მოქალაქე დააკავეს. ამოღებული ნარკოტიკის ე.წ. „შავ ბაზარზე“ ღირებულება მილიონნახევარ ლარს აჭარბებს.

გამოძიების ინფორმაციით, დაკავებული პირი, რომელიც უცხო ქვეყნის მოქალაქეა, საზღვარგარეთიდან ფარულად გამოგზავნილი ნარკოტიკის რეალიზაციას გეგმავდა. მისი დანაშაულებრივი სქემის მიხედვით, განსაკუთრებით დიდი ოდენობით ნარკოტიკული საშუალება თბილისში, ერთ-ერთ ავტოსადგომზე უნდა მიეღო.

სამართალდამცველებმა, კომპლექსური საგამოძიებო ღონისძიებების ფარგლებში, ბრალდებულისთვის განკუთვნილი ნარკოტიკული ნივთიერება – დაახლოებით 4 კილოგრამი „ალფა-პვპ“ – ჯერ კიდევ საქართველოს ერთ-ერთ რეგიონში ამოიღეს, როგორც ნივთმტკიცება. ამის შემდეგ, პოლიციამ ამანათის კონტროლირებადი მიწოდება განახორციელა ადრესატთან.

ბრალდებული, საკუთარი დანაშაულებრივი გეგმის მიხედვით, ამანათს თბილისში, ავტოსადგომზე დახვდა, რის შემდეგაც დედაქალაქის დატოვება სცადა. საგამოძიებო მოქმედებების შედეგად, სამართალდამცველებმა მამაკაცი თბილისის გასასვლელში შეაჩერეს, როდესაც ის საკუთარი ავტომობილით გადაადგილდებოდა.

ავტომობილის ჩხრეკისას პოლიციამ ნივთმტკიცებად ამოიღო როგორც კონტროლირებადი ამანათი, ასევე ნარკოტიკების დაფასოებისთვის საჭირო მასალები. გამოძიება მიმდინარეობს საქართველოს სისხლის სამართლის კოდექსის 19-260-ე, 19-260-ე პრიმა და 19-260-ე ტერცია მუხლებით, რაც განსაკუთრებით დიდი ოდენობით ნარკოტიკული საშუალების უკანონო შეძენის, შენახვის, გადაზიდვისა და რეალიზაციის ხელშეწყობის მცდელობას გულისხმობს. დანაშაული ითვალისწინებს 20 წლამდე ან უვადო თავისუფლების აღკვეთას.