ალასკაში ავიაკატასტროფა: ჩარტერული თვითმფრინავის ჩამოვარდნას 8 ადამიანი ემსხვერპლა

ტრაგიკული ინციდენტი დატრიალდა დასავლეთ ალასკის შორეულ რეგიონში, სადაც ჩარტერული თვითმფრინავი ჩამოვარდა. ავიაკატასტროფას ბორტზე მყოფი რვავე ადამიანის სიცოცხლე ემსხვერპლა.

CNN-ის მიერ გავრცელებული ინფორმაციით, კატასტროფა დისტანციური რადარის სადგურთან ახლოს მოხდა. წინასწარი მონაცემებით, Cessna 441 ტიპის თვითმფრინავი ანკორიჯიდან სამხრეთ-დასავლეთით, დაახლოებით 450 მილის დაშორებით მდებარე კეიპ ნიუენჰემის მიმართულებით ასრულებდა რეისს, რა დროსაც დანიშნულების ადგილთან სიახლოვეს ჩამოვარდა.

Associated Press-ი, თავის მხრივ, იუწყება, რომ სატრანსპორტო უსაფრთხოების ეროვნული საბჭოს (NTSB) ალასკის რეგიონის ხელმძღვანელმა, კლინტ ჯონსონმა, დაადასტურა, რომ ჩამოვარდნილ რეისზე ორი პილოტი და ექვსი მგზავრი იმყოფებოდა.

ამ ეტაპზე ავიაკატასტროფის ზუსტი მიზეზები უცნობია. მომხდარის დეტალების დასადგენად გამოძიებას ფედერალური საავიაციო ადმინისტრაცია (FAA) და სატრანსპორტო უსაფრთხოების ეროვნული საბჭო (NTSB) ერთობლივად ჩაატარებენ.