თეონა ჭალიძე სახალხო დამცველს: შეისწავლეთ სოციალურად დაუცველთა ბაზიდან მოქალაქეების არასამართლიანი ამოღება

პოლიტიკოსი თეონა ჭალიძე მოუწოდებს სახალხო დამცველს, აქტიური მონიტორინგი გაუწიოს სოციალურად დაუცველთა მონაცემთა ბაზის „გაწმენდის“ პროცესს, რომელსაც სოციალური მომსახურების სააგენტო ახორციელებს. როგორც „ინტერპრესნიუსი“ იუწყება, ჭალიძე მიიჩნევს, რომ აუცილებელია საარსებო შემწეობის შეჩერებასა და შეწყვეტასთან დაკავშირებული კონკრეტული „მავნე პრაქტიკების“ შესწავლა და შესაბამისი რეკომენდაციების გაცემა.

თეონა ჭალიძის განცხადებით, სოციალური მომსახურების სააგენტომ მიმდინარე წელს ინტენსიური გადამოწმებების შედეგად 133 324 ადამიანს შეუწყვიტა საარსებო შემწეობა. მისი თქმით, ეს სტატისტიკა, თითქოსდა, 39 530 ოჯახის სოციალურ-ეკონომიკური მდგომარეობის გაუმჯობესებაზე მიუთითებს, თუმცა რეალობა შეიძლება განსხვავებული იყოს. პოლიტიკოსი აღნიშნავს, რომ ამ რიცხვში არ შედის ის პირები, რომლებსაც სარეიტინგო ქულის გაზრდის გამო შემწეობის ოდენობა შეუმცირდათ, მიუხედავად იმისა, რომ სრულად არ მოხსნიათ.

ჭალიძე ხაზს უსვამს, რომ არსებული სოციალური პროგრამები ისედაც მრავალ ხარვეზს შეიცავს და ხშირად ვერ აღწევს რეალურად გაჭირვებულ მოქალაქეებამდე, რის გამოც ბევრი მათგანი განაცხადის გაკეთებაზეც კი უარს ამბობს იმედგაცრუების ფონზე.

პოლიტიკოსი რამდენიმე კონკრეტულ მაგალითს ასახელებს, რაც, მისი აზრით, სისტემის უსამართლობაზე მიუთითებს:

• 16 წლის მოზარდებისთვის, მათ შორის შეზღუდული შესაძლებლობის მქონე ბავშვებისთვის, საარსებო შემწეობის მოხსნა, მაშინ როცა ისინი ჯერ კიდევ სკოლის მოსწავლეები არიან.
• ზამთრის პერიოდში კომუნალური გადასახადების ოდენობის კრიტერიუმად გამოყენება. ჭალიძის თქმით, სოფლად მცხოვრებ პირებს ხშირად უჭირთ შეშის ერთიანად შეძენა, რის გამოც ბუნებრივ აირს მეტს მოიხმარენ, რაც მათთვის სარეიტინგო ქულის გაზრდის მიზეზი ხდება. ასევე, არ არის გათვალისწინებული ის ფაქტი, რომ ზოგიერთ ოჯახს ბუნებრივი აირი საერთოდ არ მიეწოდება და ზამთარში ელექტროენერგიაზეა დამოკიდებული.
• ძალადობის მსხვერპლის სტატუსისა და მათ წინაშე არსებული გამოწვევების უგულებელყოფა.

თეონა ჭალიძე ასევე ეჭვქვეშ აყენებს სოციალური აგენტების მუშაობის მეთოდებს. მისი თქმით, მოქალაქეები ხშირად ჩივიან, რომ დეკლარაციები არასწორად ივსება, ზოგიერთი აგენტი კი მონაცემებს „ვარაუდით“ წერს. პოლიტიკოსი არ გამორიცხავს, რომ ეს არ იყოს მხოლოდ „თვითშემოქმედება“ და შესაძლოა, აგენტებს ჰქონდეთ არაფორმალური მითითება, რაც შეიძლება მეტ ადამიანს შეუწყვიტონ ან შეუმცირონ საარსებო შემწეობა, ვინაიდან გადაწყვეტილება სწორედ მათი შევსებული დეკლარაციების საფუძველზე მიიღება.

პოლიტიკოსი აღნიშნავს, რომ სოციალური მომსახურების სააგენტო საზოგადოებას დეტალურ განმარტებებს არ აწვდის იმის შესახებ, თუ რა კონკრეტული საფუძვლებით მოხდა ამდენი ადამიანისთვის შემწეობის შეწყვეტა მასშტაბური „ბაზის გაწმენდის“ ფარგლებში.

„მნიშვნელოვანია, რომ სახალხო დამცველმა შეისწავლოს საარსებო შემწეობის შეჩერება-შეწყვეტასთან დაკავშირებული კონკრეტული მავნე პრაქტიკები და გასცეს შესაბამისი რეკომენდაციები. მივმართავ სახალხო დამცველს, რომ მონიტორინგი გაუწიოს ამ პროცესს და შეისწავლოს, რამდენად სამართლიანად ხდება „ბაზის გაწმენდა“, როგორც თავად უწოდებენ სოციალური მომსახურების სააგენტოში. ამ ბაზის გაწმენდაზეა დამოკიდებული ბევრი ადამიანის ყოველდღიური ყოფა და ბრძოლა გადარჩენისთვის“, – აცხადებს ჭალიძე.

თეონა ჭალიძე მოუწოდებს, შეწყდეს სოციალური პროგრამების პოლიტიკური და საარჩევნო მიზნებისთვის გამოყენება, ასევე დასრულდეს ადამიანების გაჭირვებით მანიპულირება და სიღარიბის მაჩვენებელი სტატისტიკების ხელოვნური მართვა.

ინფორმაციისთვის, ამჟამად საქართველოში საარსებო შემწეობას 576 902 პირი, ანუ 145 391 ოჯახი იღებს.