პროკურატურა ბაჩალიაშვილის საქმეზე ხელახალ გამოძიებას გამორიცხავს: ყველა მტკიცებულება თვითმკვლელობაზე მიუთითებს

საქართველოს პროკურატურა პროგრამისტ თამარ ბაჩალიაშვილის გარდაცვალების საქმესთან დაკავშირებით განცხადებას ავრცელებს, რომელშიც კიდევ ერთხელ ხაზგასმით აღნიშნავს, რომ საქმეზე დანაშაული არ გამოვლენილა და ხელახალი გამოძიების დაწყება ყოველგვარ სამართლებრივ საფუძველს მოკლებულია. უწყების მტკიცებით, 2020 წლის 17 დეკემბერს დასრულებული გამოძიების ფარგლებში მოპოვებული მტკიცებულებები ცალსახად ადასტურებს, რომ ბაჩალიაშვილმა სიცოცხლე თვითმკვლელობით დაასრულა.

პროკურატურის ინფორმაციით, გამოძიების საწყისი ეტაპიდანვე თამარ ბაჩალიაშვილის ოჯახის წევრებსა და მათ ადვოკატებს სრული წვდომა ჰქონდათ საქმის მასალებზე და დეტალურად იყვნენ ინფორმირებულნი მიმდინარე პროცესის შესახებ. მათი თხოვნით ჩატარდა ასობით საგამოძიებო და საპროცესო მოქმედება, გადამოწმდა ყველა შესაძლო ვერსია, მათ შორის მედიასაშუალებებით გავრცელებული სცენარები. მიუხედავად ამისა, შეგროვებულმა მტკიცებულებებმა გამორიცხა ვინმეს მხრიდან რაიმე უკანონო ქმედების განხორციელება.

უწყება ხაზს უსვამს გამოძიების გამჭვირვალობასაც, რომლის ფარგლებშიც ჩატარდა არაერთი ბრიფინგი და პრესკონფერენცია, ჟურნალისტებს კი ამომწურავი ინფორმაცია მიეწოდათ ყველა კითხვაზე.

გამოძიების მსვლელობისას, 600-ზე მეტი პირი გამოიკითხა, ჩატარდა ათეულობით საექსპერტო კვლევა, დამუშავდა ასობით საათის ვიდეოჩანაწერი, გაანალიზდა ათასობით სატელეფონო აქტივობის შესახებ საკომუნიკაციო ოპერატორებისგან მიღებული ინფორმაცია. აღდგენილ იქნა თამარ ბაჩალიაშვილის ტელეფონსა და კომპიუტერში არსებული ყველა მონაცემი. საერთაშორისო სამართლებრივი თანამშრომლობის ფარგლებში, ამერიკის შეერთებული შტატების შესაბამისი უწყებების დახმარებით, Facebook-დან და Instagram-დან მოთხოვნილ იქნა სრული ინფორმაცია ბაჩალიაშვილის პირად ანგარიშებთან დაკავშირებით.

მოპოვებული მტკიცებულებების საფუძველზე, წუთობრივი სიზუსტით აღდგენილ იქნა თამარ ბაჩალიაშვილის მიერ თვითმკვლელობის დაგეგმვისა და განხორციელების პროცესი. 2017 წლის აგვისტოდან, შპს „ზეგში“ მუშაობის პერიოდში, თამარ ბაჩალიაშვილს გრძნობები გაუჩნდა მისი უფროსის, ნ.გ.-ს მიმართ. იგი ვებგვერდ „momavali.me“-ს მეშვეობით უგზავნიდა მას სასიყვარულო შეტყობინებებს, სადაც საუბრობდა თავის ტანჯვაზე და თვითმკვლელობაზე ფიქრებზე. ამავე ვებგვერდით, ბაჩალიაშვილი საკუთარ თავსაც უგზავნიდა წერილებს, სადაც სუიციდურ აზრებს გამოხატავდა. მაგალითად, 2020 წლის 20 თებერვალს გაგზავნილ წერილში, რომელიც 27 ივნისს უნდა მიეღო, იგი საკუთარ თავს ეკითხება: „ისევ ისე ცუდად ხარ და ისევ ხშირად ფიქრობ სიკვდილზე? ან იქნებ უკვე იცი კიდეც რა არის?“

2020 წლის 21 თებერვალს, თამარ ბაჩალიაშვილმა Facebook-ის ერთ-ერთ ჯგუფში დაწერა სუიციდური აზრების, წარუმატებელი მცდელობისა და ფსიქოლოგის ან ფსიქიატრის ძიების თაობაზე. თებერვალში მან ფსიქოლოგთან სიარულიც დაიწყო.

კომპიუტერიდან ამოღებული ინფორმაციით დგინდება, რომ თვითმკვლელობამდე ერთი თვით ადრე, 2020 წლის 18 ივნისს, მან Google-ის საძიებო სისტემაში ინგლისურ ენაზე მოიძია ინფორმაცია თვითმკვლელობის გზებზე. იგი გადავიდა სტატიაზე, სადაც აღწერილი იყო სხვადასხვა მეთოდი, მათ შორის ელექტროშოკი, ვენების გადაჭრა და მედიკამენტების ჭარბი დოზა.

თვითმკვლელობის შერჩეულ მეთოდზე დამატებითი ინფორმაციის მისაღებად, 2020 წლის 17 ივლისს, 13:48-დან 13:58 საათამდე, ბაჩალიაშვილმა Google-ში მოძებნა „საძილე აბები ურეცეპტოდ“ და „სად იყიდება ურეცეპტოდ თბილისში ფსიქოტროპული აბები“. მოგვიანებით, იგი ეძებდა სხვადასხვა მედიკამენტებს და გადავიდა ბმულებზე, სადაც აღწერილი იყო ერთი კონკრეტული პრეპარატის ჭარბი დოზის შედეგები, მათ შორის გულის მწვავე უკმარისობა. სწორედ ამ მედიკამენტის ცარიელი ფირფიტები, რომლებზეც მხოლოდ მისი დნმ აღმოჩნდა, ამოღებული იქნა მისი ავტომანქანიდან. ქიმიური ექსპერტიზით დადგინდა, რომ მისი ორგანიზმში აღმოჩნდა ამ პრეპარატის, სხვა მედიკამენტებთან ერთად, გადაჭარბებული დოზა.

გამოძიებამ ასევე დაადგინა, რომ 17 ივლისს, თამარ ბაჩალიაშვილმა რუსთავის გზატკეცილზე და გორგასლის ქუჩაზე მდებარე აფთიაქებში შეიძინა სხვადასხვა მედიკამენტები: 20 აბი საძილე საშუალება, 28 აბი ანტიდეპრესანტი, 30 აბი ჰისტამინური რეცეპტორების ბლოკატორის შემადგენელი პრეპარატი, 60 აბი არტერიული წნევის პრეპარატი და 12 აბი ნატრიუმის კოფეინის ბენზოატის შემადგენლობის პრეპარატი, ასევე ჩაი.

სახლში დაბრუნების შემდეგ, 18:06 საათზე, მან „momavali.me“-ს მეშვეობით ორი წერილი გაუგზავნა უფროსს შინაარსით „მართლა ძალიან მიყვარდი“ და „კმაყოფილი ხარ?“, რომლებიც ადრესატს 2021 და 2022 წლებში უნდა მიეღო. ამავე დროს, მან საკუთარ ელექტრონულ ფოსტაზე გააგზავნა წერილი შეკითხვით „ცოცხალი ხარ?“, რომელიც 2021 წლის 21 ივლისს უნდა მიეღო. იმავე დღეს, 18:35 საათზე, ბაჩალიაშვილმა Google-ში მოძებნა „ფეისბუქის ანგარიშის გაუქმება სიკვდილის შემდეგ“ და გაეცნო ინფორმაციას Facebook-ის დახმარების განყოფილებაში ანგარიშის წაშლის ან მემორიალიზაციის შესახებ.

პროკურატურა ხაზგასმით აღნიშნავს, რომ ყველა ეს დეტალი, ერთობლივად და თანმიმდევრულად, უტყუარად ადასტურებს თამარ ბაჩალიაშვილის მიერ სიცოცხლის თვითმკვლელობით დასრულების ფაქტს.