ევროკომისია უკრაინისთვის 6.1 მილიარდ ევროს გამოყოფს შეიარაღების შესაძენად

ევროკომისია უკრაინის თავდაცვისუნარიანობის გასაძლიერებლად მნიშვნელოვან ფინანსურ პაკეტს გამოყოფს. ბრიუსელის გადაწყვეტილებით, კიევს 6.1 მილიარდი ევრო გადაეცემა შეიარაღების შესაძენად, რაც რუსეთის აგრესიის ფონზე უკრაინისთვის სასიცოცხლოდ მნიშვნელოვან დახმარებას წარმოადგენს. ამის შესახებ ინფორმაციას ევროკომისიის პრესსამსახური ავრცელებს, დეტალებს კი ევროკომისიის პრეზიდენტი, ურსულა ფონ დერ ლაიენი აზუსტებს.

„უკრაინის დამოუკიდებლობის დღეს, ევროპა კიდევ ერთხელ ადასტურებს, რომ ჩვენი მხარდაჭერა ურყევია და უცვლელი რჩება. დღეს, ჩვენ დავამტკიცეთ 6.1 მილიარდი ევროს გამოყოფა. იმ ფონზე, როდესაც რუსეთი თავის შეტევებს აძლიერებს და უკრაინაზე ზეწოლა იზრდება, ჩვენი მიზანია, გავაძლიეროთ ძალისხმევა, რათა უკრაინას დავეხმაროთ საკუთარი მოსახლეობისა და საჰაერო სივრცის დაცვაში“, – განაცხადა ურსულა ფონ დერ ლაიენმა, ხაზგასმით აღნიშნა რა ევროკავშირის მტკიცე პოზიცია რუსეთ-უკრაინის ომში.

აღნიშნული დახმარება მიზნად ისახავს უკრაინის თავდაცვის სექტორის გაძლიერებას, რაც ქვეყანას საშუალებას მისცემს, ეფექტურად გაუმკლავდეს მიმდინარე სამხედრო კონფლიქტს და დაიცვას თავისი სუვერენიტეტი. ევროკავშირი აგრძელებს უკრაინის მხარდაჭერას როგორც ფინანსური, ასევე პოლიტიკური და ჰუმანიტარული კუთხით.