შსს-მ რუსთავში 6 მილიონი ლარის ნარკოტიკი ამოიღო – დაკავებულია 2 უცხოელი და კიდევ 24 პირი

საქართველოს სამართალდამცავმა უწყებებმა ნარკოტიკული საშუალებების უკანონო ბრუნვის წინააღმდეგ ბრძოლაში მნიშვნელოვან წარმატებას მიაღწიეს. შინაგან საქმეთა სამინისტროს მიერ ჩატარებული მასშტაბური ოპერაციის შედეგად, რუსთავში 33 კილოგრამამდე ნარკოტიკი, კერძოდ, ე.წ. ჰაშიში ამოიღეს, რომლის საბაზრო ღირებულება, ე.წ. „შავ ბაზარზე“, 6 მილიონ ლარს აღწევს. ამის შესახებ ცენტრალური კრიმინალური პოლიციის დეპარტამენტის დირექტორმა, დავით კიკნაძემ, შსს-ში გამართულ ბრიფინგზე განაცხადა.

აღნიშნული საპოლიციო ღონისძიების ფარგლებში, ნარკოდანაშაულის ბრალდებით ქალაქ რუსთავში ორი უცხო ქვეყნის მოქალაქე დააკავეს. სამართალდამცველების მიერ ბრალდებულების საცხოვრებელი ბინიდან ნივთმტკიცებად ამოღებულია განსაკუთრებით დიდი ოდენობით, დაახლოებით 33 კილოგრამი ნარკოტიკული საშუალება „ტეტრაჰიდროკანაბინოლი“, იგივე ჰაშიში. ნარკოტიკის ნაწილი დაკავებულებს, ამავე ბინაში, ავტომანქანის საბურავებში ჰქონდათ გადამალული, რაც დანაშაულებრივი ქმედების დაფარვის მცდელობაზე მიუთითებს.

ამასთანავე, რუსთავში, ბრალდებულების კიდევ ერთი საცხოვრებელი ბინიდან და სასტუმროს ნომრიდან, სამართალდამცველებმა ასევე ამოიღეს განსაკუთრებით დიდი ოდენობით სხვა ნარკოტიკული საშუალებები, მათ შორის „კოკაინი“, „ჰეროინი“ და „მეთადონი“.

გამოძიებით დადგენილია, რომ დაკავებული პირები შეთანხმებულად მოქმედებდნენ და ნარკოტიკის რეალიზაციას სხვადასხვა მეთოდით გეგმავდნენ, თუმცა შინაგან საქმეთა სამინისტროს ოპერატიული რეაგირების შედეგად მათი დანაშაულებრივი განზრახვა აღკვეთილ იქნა.

აღსანიშნავია, რომ ბოლო რამდენიმე დღის განმავლობაში, თბილისსა და საქართველოს სხვა რეგიონებში ჩატარებული ინტენსიური საპოლიციო ღონისძიებების შედეგად, ნარკოდანაშაულისთვის კიდევ 24 პირია დაკავებული. მათ შორის 15 პირი ნარკოტიკების რეალიზაციაში სხვადასხვა ფორმით იყო ჩართული.

ეს პირები ნარკოდანაშაულებრივ სქემებში აქტიურად მონაწილეობდნენ, იყენებდნენ როგორც ინტერნეტაპლიკაციებს, ასევე ნარკოტიკების ხელიდან ხელში გადაცემისა და კონკრეტულ ადგილებში განთავსების („ჩადების“) მეთოდებს, რაც ნარკორეალიზაციის ფართო ქსელზე მიუთითებს.

სამართალდამცავებმა ნივთმტკიცებად ამოიღეს სარეალიზაციოდ გამზადებული სხვადასხვა სახის ნარკოტიკული საშუალებები, მათი დაფასოებისთვის საჭირო მასალები, ფული და ასევე, სპეციალურად მოწყობილი სათბურები, სადაც განსაკუთრებით დიდი ოდენობით ნარკოტიკული საშუალებების უკანონო კულტივირება ხდებოდა.

გამოძიება მიმდინარეობს საქართველოს სისხლის სამართლის კოდექსის 260-ე, 260-ე პრიმა, 19 – 260-ე და 265-ე პრიმა მუხლებით, რაც ითვალისწინებს 20 წლამდე ან უვადო თავისუფლების აღკვეთას. შინაგან საქმეთა სამინისტრო ხაზგასმით აცხადებს, რომ ქვეყანაში ნარკოტიკული საშუალებების უკანონო შემოტანისა და გავრცელების აღკვეთის მიზნით, შესაბამისი კომპლექსური ღონისძიებები აქტიურად გაგრძელდება.