საქართველოს ბანკის მხარდაჭერით ტაშკენტში მასშტაბური ბიზნესგამოფენა „აბრეშუმის გზა“ გაიმართება

ქართული ბიზნესის საერთაშორისო ასპარეზზე გაყვანისა და ახალი პარტნიორობების დამყარების მიზნით, საქართველოს ბანკი, გაყიდვების ასოციაციასთან ერთად, უზბეკეთში მასშტაბურ ბიზნესგამოფენას უმასპინძლებს. ტაშკენტი, 2026 წლის 7-8 ოქტომბერს, უკვე მეორედ მიიღებს საერთაშორისო ფორუმს სახელწოდებით „საქართველო – უზბეკეთი აბრეშუმის გზა“, რომელიც ქართულ კომპანიებს ცენტრალური აზიის ერთ-ერთ ყველაზე დინამიურ ბაზარზე გასვლის უნიკალურ შესაძლებლობას სთავაზობს.

ღონისძიება, რომელიც SOLO Business-ის მომხმარებლების მხარდაჭერით ხორციელდება, გაყიდვების ასოციაციის ინიციატივით იმართება. მასში პარტნიორებად ჩართულნი არიან The Europe-Uzbekistan Association for Economic Cooperation (EuroUZ) და უზბეკეთის სავაჭრო-სამრეწველო პალატა. ეს თანამშრომლობა მნიშვნელოვნად გააფართოებს ქართული ბიზნესის წვდომას გლობალურ საქმიან წრეებთან.

„საქართველო – უზბეკეთი აბრეშუმის გზის“ მთავარი მიზანია საქართველოსა და უზბეკეთს შორის სავაჭრო-ეკონომიკური კავშირების გაღრმავება, ქართული პროდუქტებისა და სერვისებისათვის ახალი ბაზრების გახსნა და გრძელვადიანი საერთაშორისო პარტნიორობების ხელშეწყობა. JW Marriott Tashkent-ში დაგეგმილი გამოფენა 2,000-მდე კორპორაციული სექტორის წარმომადგენელს მოიზიდავს, ხოლო მონაწილეობას 50-მდე ქართული კომპანია მიიღებს სხვადასხვა ინდუსტრიიდან.

ქართულ კომპანიებს ექნებათ შანსი, დეტალურად გაეცნონ უზბეკეთის ბიზნესგარემოსა და ბაზრის პოტენციალს, ჩაერთონ B2B (Business-to-Business) შეხვედრებში და დაამყარონ კონტაქტები ადგილობრივ და საერთაშორისო ინვესტორებთან და კომპანიებთან. ეს მათ საშუალებას მისცემს, წარმოაჩინონ საკუთარი პროდუქცია და მომსახურება ფართო საერთაშორისო აუდიტორიის წინაშე და მოძებნონ ახალი საქმიანი პარტნიორები.

გაყიდვების ასოციაციის პრეზიდენტმა, დავით ჩიკვაიძემ აღნიშნა, რომ ბოლო წლებში უზბეკეთის მიმართ ინვესტორთა ინტერესი საგრძნობლად გაიზარდა, რასაც მონაწილეთა მრავალფეროვნებაც ადასტურებს. წელს გამოფენაში ისეთი ცნობილი ქართული კომპანიები ჩაერთვებიან, როგორებიცაა „იმობილიარე“, „თეგეტა მოტორსი“, „სოფტგენი“, „ვეზირი“, „თბილისი ბულვარი“, „მანდეი“ და „ასკანელი“. მასშტაბის გაზრდის მიზნით, ორგანიზატორებმა ადგილობრივ მსხვილ ინსტიტუტებთან, მათ შორის EuroUZ-სა და უზბეკეთის სავაჭრო პალატასთან, ითანამშრომლეს. გამოფენის განახლებული კონცეფცია მხოლოდ ბიზნეს სექტორის წარმომადგენლებს მოიაზრებს, რაც მიზნობრივი აუდიტორიის უზრუნველყოფას ემსახურება. ასევე, დაგეგმილია ინდივიდუალური B2B შეხვედრები, მრგვალი მაგიდები და ვიზიტები ადგილობრივ კომპანიებში, რაც ქართულ ბიზნესს უზბეკეთის ბაზრის სიღრმისეულად გაცნობაში დაეხმარება.

საქართველოს ბანკის მცირე და საშუალო ბიზნესის მიმართულების ხელმძღვანელმა, თორნიკე კუპრაშვილმა ხაზი გაუსვა ბანკის როლს ქართული ბიზნესის საერთაშორისო განვითარებაში. მისი თქმით, ბანკი ფინანსურ რესურსებთან ერთად, ისეთ პლატფორმებსაც ქმნის, რომლებიც კომპანიებს ახალი პარტნიორების მოძიებაში, გლობალურ ბაზრებზე გასვლასა და საქმიანობის გაფართოებაში ეხმარება. კუპრაშვილის განცხადებით, ეს გამოფენა SOLO Business-ის მომხმარებლებს უზბეკეთის ბაზრის შესწავლის, ახალი კავშირების დამყარებისა და ბიზნესის გაფართოების პერსპექტივების განხილვის საშუალებას მისცემს. ბანკში იმედოვნებენ, რომ მსგავსი ინიციატივები ქართული ბიზნესის განვითარებას შეუწყობს ხელს და საერთაშორისო შესაძლებლობებს რეალურ ბიზნესპარტნიორობებად გარდაქმნის.

კომპანიებს, რომელთაც სურთ ამ მნიშვნელოვან საერთაშორისო ბიზნესგამოფენაში მონაწილეობა და უზბეკეთის ბაზრის შესაძლებლობების გაცნობა, შეუძლიათ დარეგისტრირდნენ შესაბამის პლატფორმაზე (მონაწილეობა ფასიანია).