ფონდი „ქართუ“ პრობლემური სესხების პატიების პროგრამას განმარტავს

ფონდი „ქართუ“ სპეციალურ განცხადებას ავრცელებს, რომელშიც 2018 წელს განხორციელებული პრობლემური სესხების პატიების პროგრამის დეტალებს განმარტავს და სოციალურ მედიაში გავრცელებულ ყალბ ინფორმაციას პასუხობს.

განცხადების თანახმად, „ფონდმა ქართუმ“ „სოციალური სოლიდარობის აქტის“ ფარგლებში, უპრეცედენტო ქველმოქმედება განახორციელა. ამ ინიციატივის ფარგლებში, ფიზიკური პირების 4,104,429,484 ლარის მოცულობის პრობლემური ვალდებულებები იქნა გამოსყიდული.

პროგრამის შედეგად, 615,164 პირს 1,387,296 სესხი ჩამოეწერა. ეს მასშტაბური ქმედება შეეხო საქართველოში მოქმედ 55 ბანკსა და სხვადასხვა ფინანსურ ინსტიტუტს, რამაც მნიშვნელოვნად შეამსუბუქა მოქალაქეების ფინანსური მდგომარეობა და გააჯანსაღა ქვეყნის ეკონომიკური გარემო.

ფონდის მიერ შეძენილი იქნა მხოლოდ ის სესხები, რომლებიც აკმაყოფილებდა წინასწარ გაცხადებულ მკაცრ კრიტერიუმებს: სესხის ძირი არ უნდა აღემატებოდეს 2,000 ლარს და მოვალეებს (ფიზიკურ პირებს) ბოლო ერთი წლის განმავლობაში არ უნდა ჰქონოდათ დაფარული სესხის პროცენტი.

ხაზგასმით აღინიშნა, რომ სესხები გამოსყიდული იყო მხოლოდ იმ ფინანსური ინსტიტუტებისგან, რომლებმაც თანხმობა განაცხადეს ამ პროგრამაში მონაწილეობაზე. მოქალაქეებს, რომლებსაც ეს პროგრამა შეეხო, შეუძლიათ გადაამოწმონ თავიანთი სტატუსი და მიიღონ შესაბამისი ცნობა საკრედიტო საინფორმაციო ბიურო „კრედიტინფოდან“. გარდა ამისა, მოქალაქის წერილობითი მომართვის შემთხვევაში, „ფონდი ქართუ“ გასცემს დეტალურ ინფორმაციას კონკრეტული სესხის თაობაზე.

„ფონდი ქართუ“ კიდევ ერთხელ ადასტურებს, რომ ეს ვალდებულებები გამოსყიდულ იქნა მხოლოდ მათი პატიების მიზნით და ფონდის მხრიდან სესხებზე რაიმე სახის მოთხოვნა სრულიად გამორიცხულია. შესაბამისად, თუ დღეს რომელიმე ფიზიკურ პირს საკრედიტო დაწესებულება მოსთხოვს ხსენებული პერიოდის სესხის დაფარვას, ეს ან შეცდომაა, რომლის გადამოწმებაც მარტივად არის შესაძლებელი, ან ეს კონკრეტული ვალდებულება არ აკმაყოფილებდა დადგენილ კრიტერიუმებს და, შესაბამისად, ვერ მოხვდა 2018 წლის პროგრამაში.

ფონდი მოუწოდებს ყველა დაინტერესებულ პირს, არ აჰყვეს არაკეთილსინდისიერი პირების მიერ ატეხილ აჟიოტაჟს და გადაამოწმოს საკუთარი ვალდებულებების სტატუსი შესაბამის სტრუქტურებში.