თბილისში სწრაფი ჩარიცხვის აპარატის ქურდობის მცდელობა: 4 პირი ცხელ კვალზე დააკავეს

შინაგან საქმეთა სამინისტროს თანამშრომლებმა თბილისში, სწრაფი ჩარიცხვის აპარატის ჯგუფური ქურდობის მცდელობის ფაქტზე ოთხი პირი ცხელ კვალზე დააკავეს. ინფორმაციას უწყების პრესსამსახური ავრცელებს.

როგორც გამოძიებით დადგინდა, გლდანი-ნაძალადევის პოლიციის მთავარი სამმართველოს თანამშრომლებმა, ოპერატიული მოქმედებების შედეგად, აღკვეთეს დანაშაული, რომლის მიზანიც დიდი ოდენობით თანხის უკანონოდ დაუფლება იყო. ბრალდებულებმა სცადეს სწრაფი ჩარიცხვის ტერმინალის მოპარვა და შემთხვევის ადგილიდან ავტომობილით მიმალვა, თუმცა მათი განზრახვა სრულად ვერ განხორციელდა.

სამართალდამცველებმა ოთხივე ეჭვმიტანილი შემთხვევის ადგილის სიახლოვეს დააკავეს. პოლიციამ ნივთმტკიცებად ამოიღო მოპარული აპარატი, მასში არსებული დაახლოებით 4000 ლარი და ასევე ის ხელსაწყოები, რომლებიც დანაშაულის ჩადენის მცდელობისას გამოიყენეს.

გამოძიება საქართველოს სისხლის სამართლის კოდექსის 19-177-ე მუხლით მიმდინარეობს, რაც გულისხმობს ქურდობის მცდელობას, ჩადენილს ჯგუფურად. აღნიშნული დანაშაული ითვალისწინებს თავისუფლების აღკვეთას შვიდ წლამდე ვადით.