პენიტენციური სამსახური სააკაშვილის ბრალდებებს უარყოფს: ირაკლი ნადირაძის საქმეზე ახალი განცხადება

სპეციალურმა პენიტენციურმა სამსახურმა განცხადება გაავრცელა, რომელშიც მსჯავრდებულ მიხეილ სააკაშვილის მიერ სოციალურ ქსელში ირაკლი ნადირაძის შესახებ გავრცელებულ ინფორმაციას გამოეხმაურა. უწყება ამ ცნობებს ცრუსა და დისკრედიტაციულს უწოდებს.

უწყების განმარტებით, მსჯავრდებული ირაკლი ნადირაძე, სამ სხვა პირთან ერთად, ოთხადგილიან საკანშია განთავსებული. პენიტენციური სამსახური ხაზგასმით აღნიშნავს, რომ საკნის პირობები სრულად შეესაბამება წამების პრევენციის ევროპული კომიტეტის (CPT) სტანდარტებს. მათივე ინფორმაციით, არც ნადირაძეს და არც მასთან ერთად მყოფ პირებს ადმინისტრაციისთვის რაიმე პრეტენზიით არ მიუმართავთ.

„მსჯავრდებულ ირაკლი ნადირაძეს დაწესებულების მხრიდან არანაირი შეზღუდვა არ აქვს. ის სრულად სარგებლობს სატელეფონო საუბრისა და პაემნის უფლებით და შეუფერხებლად შეუძლია გარე სამყაროსთან კომუნიკაცია“, — ნათქვამია სამსახურის განცხადებაში.

სპეციალური პენიტენციური სამსახური საზოგადოებასა და დაინტერესებულ მხარეებს მოუწოდებს, თავი შეიკავონ მსგავსი, გადაუმოწმებელი ცნობების გავრცელებისგან. უწყების განცხადებით, ამგვარმა განცხადებებმა შესაძლოა მსჯავრდებულებს შორის უთანხმოება და დაძაბულობა გამოიწვიოს.

შეგახსენებთ, რომ საქართველოს მესამე პრეზიდენტმა, მიხეილ სააკაშვილმა სოციალურ ქსელში მკაცრად გააკრიტიკა სპეციალური პენიტენციური სამსახურის ქმედებები. მისი მტკიცებით, გლდანის ციხეში კორუფციასთან მებრძოლ „პოლიტიკურ პატიმარ“ ირაკლი ნადირაძეს საკანში ძალადობრივი დანაშაულისთვის მსჯავრდებული რეციდივისტი მიუსახლეს.

სააკაშვილის მტკიცებით, ეს ნაბიჯი მიზნად ისახავს ნადირაძის დაშინებასა და ფიზიკურ ზემოქმედებას, რადგან ის უარს ამბობს „4 ოქტომბრის“ საქმეზე პროკურატურის მოთხოვნების შესრულებაზე. პოლიტიკოსი ხელისუფლებას მკაცრი პასუხისმგებლობით ემუქრება.