ავჭალის ტრაგედია: 17 წლის გოგონას გარდაცვალება და ოჯახის ეჭვები შეყვარებულზე

თბილისში, ავჭალის რაიონში მომხდარი ტრაგედიის შედეგად, შემოვლითი რკინიგზის გაუქმებული ხიდიდან გადმოვარდნილი 17 წლის მარიამ ლომიშვილი გარდაიცვალა. ოჯახი მომხდარის გარემოებებთან დაკავშირებით კითხვებს სვამს და გამოძიებისგან სიმართლის დადგენას ითხოვს.

როგორც ოჯახის ადვოკატმა, ნანა ფარჩუკაშვილმა „ინტერპრესნიუსთან“ საუბარში განაცხადა, თუ გამოძიების შედეგად დადასტურდა, რომ მოზარდმა სიცოცხლე თვითმკვლელობით დაასრულა, ოჯახს კითხვები გაუჩნდება გარდაცვლილი გოგონას შეყვარებულთან, რომელთანაც მარიამი დაშორებას ცდილობდა.

შემთხვევა ავჭალის ხიდთან გუშინ საღამოს დაფიქსირდა. ამ დროისთვის ადგილზე საგამოძიებო მოქმედებები აქტიურად მიმდინარეობს. ადვოკატის თქმით, ოჯახმა არ იცის, ზუსტად რა მოხდა, თუმცა, მათი აზრით, არსებობს კითხვის ნიშნები, რის გამოც გამოძიების დასრულებას ელოდებიან.

„მარიამი სახლიდან გუშინ საღამოს გავიდა. დეიდას უთხრა, რომ სასეირნოდ მიდიოდა და მალე დაბრუნდებოდა. არანაირი ნიშანი იმისა, რომ ცუდ ხასიათზე ყოფილიყო ან თვითმკვლელობის სურვილი გასჩენოდა, არ არსებობდა. ჩვენ არ გამოვრიცხავთ უბედურ შემთხვევას ან დანაშაულს, მაგრამ თვითმკვლელობის ვერსიას არ განვიხილავთ“, – აღნიშნა ნანა ფარჩუკაშვილმა.

ადვოკატის განცხადებით, თუ დადგინდება, რომ ეს იყო თვითმკვლელობა, მაშინ საუბარი იქნება თვითმკვლელობამდე მიყვანაზე, რის გამოც კითხვები ერთადერთი პირის, მარიამის შეყვარებულის მიმართ გაჩნდება. „მარიამი მასთან დაშორებას ცდილობდა, ის კი თავს არ ანებებდა – ეს ფაქტია. სავარაუდოდ, მარიამი ფსიქოლოგიური ან სხვა სახის ძალადობის მსხვერპლი იყო. ჩვენ სრულად ვითანამშრომლებთ გამოძიებასთან, რათა ყველა დეტალი დადგინდეს“, – განაცხადა ფარჩუკაშვილმა.

შინაგან საქმეთა სამინისტროში „ინტერპრესნიუსს“ განუცხადეს, რომ მომხდარ ფაქტზე გამოძიება საქართველოს სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.