ცხინვალი საქართველოსგან „დამოუკიდებლობის“ აღიარებასა და ძალის გამოუყენებლობის შეთანხმებას ითხოვს

ოკუპირებული ცხინვალის რეგიონის დე ფაქტო საგარეო საქმეთა მინისტრმა, ახსარ ჯიოევმა, რუსულ მედიასთან ინტერვიუში საქართველოს მიმართ მკაფიო მოთხოვნები გააჟღერა. მისი განცხადებით, თბილისმა უნდა აღიაროს ცხინვალის „დამოუკიდებლობა“ და ხელი მოაწეროს ძალის გამოუყენებლობის შესახებ შეთანხმებას, რასაც ის რეგიონში სტაბილურობის საწინდრად მიიჩნევს.

ჯიოევის თქმით, საქართველო ჯერ კიდევ ვერ ეგუება 2008 წლის აგვისტოს ომის შემდეგ შექმნილ „ახალ გეოპოლიტიკურ რეალობას“. მან ხაზი გაუსვა, რომ ორი „ახალი სახელმწიფოს“ აღიარება და მათთან ურთიერთსასარგებლო ურთიერთობების დამყარება საქართველოს ინტერესებშიც შედის, თუმცა თბილისი ამას არ ითვალისწინებს.

დე ფაქტო მინისტრმა ასევე აღნიშნა, რომ მიუხედავად ქართული მხარის მიერ პერიოდულად გაკეთებული „მშვიდობისმოყვარე“ განცხადებებისა, ხშირად შეიმჩნევა საპირისპირო, „პროვოკაციული ელფერის“ მქონე რიტორიკა, რაც ნდობის აღდგენას ხელს უშლის.

მისი განმარტებით, „სამხრეთ ოსეთისთვის“ საკუთარი უსაფრთხოების უზრუნველყოფა უმნიშვნელოვანესია, განსაკუთრებით იმ ფონზე, რომ საქართველო უარს ამბობს ჟენევის საერთაშორისო დისკუსიების ფარგლებში ძალის გამოუყენებლობის იურიდიულად სავალდებულო დოკუმენტზე ხელმოწერაზე. ჯიოევმა ეს პოზიცია რეგიონში ნდობის აღდგენისა და სტაბილურობის განმტკიცების ხელისშემშლელ ფაქტორად შეაფასა.

მიუხედავად არსებული უთანხმოებებისა და საქართველოს მიერ „ახალი რეალობის“ არაღიარებისა, ახსარ ჯიოევმა აღნიშნა, რომ ცხინვალი მხარს უჭერს მოლაპარაკებების პროცესს, რომელიც თანასწორობასა და პატივისცემაზე იქნება დაფუძნებული.