თიბისი ბანკის მხარდაჭერით „ამბარი“ ქსელს აფართოებს და „უბნის მოლის“ კონცეფციას ნერგავს

თიბისი ბანკის აქტიური მხარდაჭერით, საცალო ვაჭრობის ქსელი „ამბარი“ ბიზნესის გაფართოების ახალ ეტაპზე გადადის. კომპანია „ამბარი რითეილ გრუპ ჯორჯიამ“ ცოტა ხნის წინ „One Price“ მაღაზიათა ქსელი შეიძინა და ახლა, თიბისისთან მჭიდრო თანამშრომლობით, რებრენდინგსა და ინტენსიურ განვითარებაზე მუშაობს.

აღნიშნული პარტნიორობის ფარგლებში, „ამბარმა“ ჯამში 22 მილიონი ლარის დაფინანსება მოიზიდა. ეს მნიშვნელოვანი ინვესტიცია ძირითადად ქსელის გაფართოებას, ახალი ფილიალების გახსნასა და „უბნის მოლის“ ინოვაციური კონცეფციის დანერგვას მოხმარდება.

რებრენდინგის შემდეგ, „ამბარი“ მომხმარებლებს სრულიად განსხვავებულ გამოცდილებას შესთავაზებს. „უბნის მოლის“ კონცეფციის მთავარი მიზანია, ყოველდღიური საჭიროებების დაკმაყოფილება ერთ სივრცეში, სახლთან ახლოს. ეს მიდგომა მომხმარებლებს საშუალებას მისცემს, დაზოგონ დრო, ენერგია და ფინანსური რესურსი, რაც თანამედროვე ცხოვრების რიტმში განსაკუთრებით აქტუალურია.

ბოლო სამი თვის განმავლობაში „ამბარის“ ქსელს უკვე 25 ახალი მაღაზია შეემატა, რის შედეგადაც ბრენდი ამჟამად 37 ფილიალს აერთიანებს. კომპანიის გეგმების მიხედვით, წლის ბოლომდე მაღაზიების რაოდენობა 60-მდე გაიზრდება, მოიცავს რა როგორც თბილისის ყველა უბანს, ასევე საქართველოს სხვა ქალაქებს. ქსელის გაფართოებასთან ერთად, დასაქმებულთა რიცხვიც მნიშვნელოვნად იზრდება – ამჟამინდელი 380 თანამშრომელი წლის ბოლოსთვის 600-მდე გაიზრდება.

აღსანიშნავია, რომ „ამბარი რითეილ გრუპ ჯორჯია“ „კოკა-კოლას ჯგუფის“ ნაწილია, რომელთანაც თიბისის მრავალწლიანი და ნაყოფიერი პარტნიორობა აკავშირებს. ბანკმა ჯგუფთან ერთად არაერთი წარმატებული პროექტი განახორციელა, მათ შორის ახალი რესტორნების გახსნა და პურ-ფუნთუშეულის საწარმოს მშენებლობა. ამგვარი ერთობლივი ინიციატივებით, თიბისი ხელს უწყობს ადგილობრივი ბიზნესის გაძლიერებას, დასაქმების ზრდასა და ქვეყნის ეკონომიკურ განვითარებას როგორც დედაქალაქში, ასევე რეგიონებში.