მცხეთის სასამართლომ ორი პირის მკვლელობისა და იარაღის უკანონო ტარებისთვის ორ ბრალდებულს უვადო პატიმრობა მიუსაჯა

მცხეთის რაიონულმა სასამართლომ უვადო თავისუფლების აღკვეთა მიუსაჯა ორ ბრალდებულს, რომლებიც დამნაშავედ იქნენ ცნობილი ორი პირის დამამძიმებელ გარემოებებში განზრახ მკვლელობისა და ცეცხლსასროლი იარაღის უკანონო შეძენა-შენახვა-ტარების ფაქტებზე. ამის შესახებ ინფორმაციას საქართველოს პროკურატურა ავრცელებს.

უწყების ცნობით, სასამართლო პროცესზე წარდგენილი მტკიცებულებებით დადასტურდა, რომ მიმდინარე წლის 24 იანვარს, მცხეთის მუნიციპალიტეტის სოფელ მუხრანში, ბრალდებულებმა შურისძიების მოტივით, ცეცხლსასროლი იარაღიდან რამდენიმეჯერ ესროლეს ორ ადამიანს, რის შემდეგაც შემთხვევის ადგილიდან მიიმალნენ. მიყენებული ჭრილობების შედეგად, ორივე დაზარალებული ადგილზე გარდაიცვალა. გამოძიებით ასევე დადგინდა, რომ ბრალდებულთა ქმედებებმა საფრთხე შეუქმნა შემთხვევის ადგილზე მყოფი სხვა პირების სიცოცხლესა და ჯანმრთელობას.

ბრალდება მათ წარედგინათ საქართველოს სისხლის სამართლის კოდექსის 109-ე მუხლის „ბ“, „ი“ და „ლ“ ქვეპუნქტებით, რაც გულისხმობს ორი პირის მიმართ ჯგუფურად ჩადენილ მკვლელობას ისეთი საშუალებით, რომელიც განზრახ საფრთხეს უქმნის სხვის სიცოცხლესა და ჯანმრთელობას. ასევე, სსკ-ის 236-ე მუხლის მეექვსე ნაწილის „ა“ და „ბ“ ქვეპუნქტებით, რაც გულისხმობს ცეცხლსასროლი იარაღისა და საბრძოლო მასალის უკანონო შეძენა-შენახვა-ტარებას ჯგუფურად, ამავე დანაშაულისთვის ნასამართლევი პირის მიერ.

სასამართლომ სრულად გაიზიარა პროკურატურის პოზიცია და ორივე ბრალდებული დამნაშავედ ცნო წარდგენილ ბრალდებებში, რის შედეგადაც მათ უმკაცრესი სასჯელი – უვადო თავისუფლების აღკვეთა განესაზღვრათ.