ბაჩო ახალაძე: მდინარაძის წასვლა „ქართულ ოცნებაში“ სისტემურ რღვევაზე მიუთითებს – ვინ იქნება შემდეგი?

პარტია „ახალის“ ჩოხატაურის ორგანიზაციის ხელმძღვანელი, ბაჩო ახალაძე, „გურია ნიუსთან“ საუბარში ხაზგასმით აღნიშნავს, რომ რეგიონული განვითარების მინისტრის, მამუკა მდინარაძის თანამდებობიდან წასვლა არა უბრალო საკადრო ცვლილება, არამედ მმართველი პარტია „ქართული ოცნების“ ხელისუფლების ვერტიკალში გაჩენილი სერიოზული ნაპრალების დამადასტურებელი ფაქტია.

ახალაძის შეფასებით, მმართველი გუნდის შიგნით მიმდინარე მოვლენები ჩვეულებრივ გადაადგილებებს სცდება და უფრო მეტად სისტემის შიდა რღვევაზე მიუთითებს. მისი თქმით, ეს არის „ხელისუფლების ჩამოშლის ბოლო სტადიის ერთ-ერთი ყველაზე მკაფიო ნიშანი“.

„როდესაც მმართველი გუნდის ერთ-ერთი ყველაზე გავლენიანი ფიგურა ტოვებს პოლიტიკას და ამ გადაწყვეტილებას წინასწარ განიხილავს პრემიერ-მინისტრთან და ბიძინა ივანიშვილთან, ეს უკვე აღარ არის მხოლოდ პირადი არჩევანის საკითხი“, — აცხადებს ახალაძე. ის ამ მოვლენას სისტემის შიგნით დაგროვილი პრობლემების, ძალაუფლების ცენტრში არსებული გამოწვევებისა და პოლიტიკური რესურსის ამოწურვის სიმპტომად მიიჩნევს.

ახალაძე ხაზს უსვამს, რომ ოლიგარქიულ მმართველობაში, სადაც გადაწყვეტილებების მთავარი ცენტრი ბიძინა ივანიშვილია, ერთი მნიშვნელოვანი ფიგურის წასვლა ბადებს კითხვას მთლიანად ხელისუფლების ვერტიკალის მდგრადობასთან დაკავშირებით.

მისი თქმით, პროცესები გავლენების გადანაწილების ახალ ფაზაში გადავიდა. „ეს არის ეტაპი, როდესაც გარედან სისტემა ჯერ კიდევ მყარად ჩანს, თუმცა შიგნით უკვე იწყება ნაპრალების გაჩენა და პოლიტიკური გუნდის დაშლის ნიშნები. ასეთ დროს ყველაზე მნიშვნელოვანი კითხვა აღარ არის, თუ ვინ შეცვლის მამუკა მდინარაძეს. მთავარი კითხვაა — ვინ იქნება შემდეგი და რამდენ ხანს შეძლებს ეს სისტემა არსებული ფორმით შენარჩუნებას“, — განმარტა ბაჩო ახალაძემ „გურია ნიუსთან“ ინტერვიუში.

შეგახსენებთ, რომ მამუკა მდინარაძემ დღეს ოფიციალურად დაადასტურა თანამდებობის დატოვება და პოლიტიკიდან წასვლა.