ასათიანი: მთავარი პრობლემა არა გადაცემის დახურვა, არამედ საზმაუს წინაშე მდგარი საფრთხეა

საზოგადოებრივ მაუწყებელზე ივლისის შუა რიცხვებიდან მაუწყებლისა და რადიო „თავისუფლების"ერთობლივი სატელევიზიო პროექტები  „წითელი ზონა“ და სალომე ასათიანის „ინტერვიუ“ აღარ გავა. ამის შესახებ ინფორმაცია „ლიბერალს“  ჟურნალისტმა სალომე ასათიანმა დაუდასტურა.  მისი თქმით, აღნიშნულის შესახებ  „რადიო თავისუფლებას“ საზოგადოებრივი მაუწყებლიდან წერილობით მიმართეს, მიზეზად კი არხის რეორგანიზაცია დაასახელეს.  გადაცემის დახურვასთან დაკავშირებით მოსაზრება ჟურნალისტმა სოციალურ ქსელში გააზიარა:  „გადაცემა „ინტერVIEW“, რადიო თავისუფლებისა და საზოგადოებრივი მაუწყებლის პროექტი, ტელეეთერში გადიოდა დაახლოებით წელიწად-ნახევრის განმავლობაში. გადაცემას ჰქონდა სამი ძირითადი მიზანი. პირველი და უმთავრესი იყო დისტანცირებული, მწვავე, უკომპრომისო და სერიოზული საუბრები ე.წ. ძალაუფლების „ღერძებთან“ - პოლიტიკურთან, მთავრობა იქნებოდა ეს თუ ოპოზიცია, რელიგიურთან, საზოგადოებრივთან თუ სხვა. მეორე - და ასევე ძალიან მნიშვნელოვანი - იყო იმ ადამიანებისა და ჯგუფების სირთულეების გაშუქება, რომელთა ხმაც ხშირად ვერ აღწევს საჯარო სივრცეში - უმცირესობების, ეკონომიკური უსამართლობის შედეგად ჩაგრული ხალხის, ვცდილობდით, გვესაუბრა ან მათთან, ამ მათ შესახებ. და გადაცემის კიდევ ერთი „ხაზი“ - ჩემი პერსონალური ამბიცია და ინტერესი იყო, რაც შეიძლება, ხშირად მოგვეწვია უცხოელი ინტელექტუალები, ანალიტიკოსები, პოლიტიკოსები, ხელოვანები და ასევე სიღრმისეულად განგვეხილა დასავლეთის პოლიტიკაში, აკადემიაში, კულტურაში მიმდინარე დისკუსიები თუ პროცესები - საინტერესო წიგნები, სპექტაკლები, მოსაზრებები. სწორედ ამ მიზნებისთვის ვმუშაობდით ბევრს და პატიოსნად. მესმის, რომ ბევრს, ვინც ეს გადაცემა იცის, პირველ რიგში „ივანიშვილთან ინტერვიუ“ ახსენდება ხოლმე - რადგან სწორედ მაშინ ველაპარაკეთ ძალაუფლების მთავარ „ღერძს“, იქნება ეს პოლიტიკური თუ ეკონომიკური თვალსაზრისით. მაგრამ ასეთივე უკომპრომისობას ვცდილობდით ყველა სხვა შემთხვევაშიც, როცა ჩვენი სტუმარი პოლიტიკოსი ან საზოგადოების წინაშე რაიმე ფორმით ანგარიშვალდებული პირი იყო. ყოველგვარი რევერანსების გარეშე ვამბობ - ჩემთვის ამ პროცესში მთავარი იყო ის, რომ ჩვენი, თუნდაც ძალიან მცირე, მაგრამ მაინც წვლილი შეგვქონდა საზოგადოებრივი მაუწყებლის იდეისა და ინსტიტუტის განვითარებაში. ეს იდეა ჩემთვის ლამის საკრალურობამდე ძვირფასია. და საზმაუზე მენეჯმენტის შეცვლისთანავე ჩემთვის უკვე ცხადი იყო, რომ მთავარ პირობას - მმართველ პოლიტიკურ კლასთან კრიტიკული დისტანციის შენარჩუნებას - ეს მაუწყებელი ვეღარ შეძლებდა. ამ ყველაფერში მთავარი პრობლემა არა „ჩემი გადაცემის დახურვა“, არამედ ის საფრთხეა, რომლის წინაშეც საზმაუ დგას ახლა“, - ამბობს სალომე ასათიანი.