ივანიშვილი: გაჩნდა შანსი, რომ მეორე ადგილზე „თავისუფალი დემოკრატები" გავიდნენ

„ჩემი აზრით, გაჩნდა შანსი, რომ მეორე ადგილზე „თავისუფალი დემოკრატები" გავიდნენ", - ამის შესახებ რეგიონულ ჟურნალისტებთან შეხვედრაზე ყოფილმა პრემიერ-მინისტრმა ბიძინა ივანიშვილმა განაცხადა.  მისი თქმით, ასეთი სცენარით, „ნაციონალური მოძრაობა" პარლამენტში შესაძლოა საერთოდ ვერ შევიდეს.  „მეორე ადგილზე მკვეთრად იკვეთებოდა „ნაციონალური მოძრაობა“. საშუალო რაოდენობა პარტიული სიიდან იყო 10 დეპუტატი, ხოლო მაჟორიტარულ არჩევნებში ვერსად მოიგებს „ნაციონალური მოძრაობა”. მათ შორის ზუგდიდშიც ვერ მოიგებს ის ქალბატონი. ვერცერთ მაჟორიტარულ ოლქში ვერ მოიგებს „ნაციონალური მოძრაობა" და ეს არის 2x2=4. საშუალო შედეგი მათი იყო 10 კაცი, მინიმუმ 5 იყო, მაქსიმუმ 15. ბოლო ორი კვირის მანძილზე, მათ აგონიურ შეცდომებს თუ გავითვალისწინებთ, ჩემი აზრით, გაჩნდა შანსი, რომ მეორე ადგილზე „თავისუფალი დემოკრატები" გავიდნენ. ეს არის ძალიან კარგი შანსი. ასეთი სცენარით, „ნაციონალური მოძრაობა" გავა 5 კაცით პარლამენტში. არ გამოვრიცხავ საერთოდ ვერ შევიდეს. თუ მარგინალიზაციას გააგრძელებენ, ეს არ არის გამორიცხული”, - განაცხადა ივანიშვილმა.  მისივე ვარაუდით, „ქართულ ოცნებას"  საპარლამენტო არჩევნების შემდეგ კოალიციური მთავრობის ჩამოყალიბება არ მოუწევს.  „დომინანტი პარტია არის „ქართული ოცნება“ და მე შემთხვევით არ ვუჭერ მხარს. არ ჰყავს ალტერნატივა და არ მოუწევს კოალიციური მთავრობის ჩამოყალიბება. ოპონირება იქნება გარეთაც და პარლამენტშიც. ჩემი აზრით, 5-6 პარტია იქნება წარმოდგენილი და ეს იქნება კარგი”, - განაცხადა ივანიშვილმა.