მოსახლეობის 74% ამბობს, რომ მარიხუანის ლეგალიზაცია არ უნდა მოხდეს - NDI
ეროვნულ-დემოკრატიულმა ინსტიტუტმა (NDI) 2018 წლის ივნისში ჩატარებული საზოგადოებრივი აზრის კვლევის შედეგები გამოაქვეყნა.
შეკითხვაზე - უნდა მოხდეს თუ არა ქვეყანაში მარიხუანის ლეგალიზაცია? გამოკითხულთა 74% ამბობს, რომ არ უნდა მოხდეს, 18% მიიჩნევს, რომ უნდა მოხდეს, ხოლო 8%-მა არ იცის.
შეკითხვაზე - უნდა მოიხადოს თუ არა ციხის სასჯელი ადამიანმა ნებისმიერი ტიპის ნარკოტიკული საშუალების (მარიხუანის, ინტრავენულის, აბებისა და ა.შ.) პირადი მოხმარების გამო? - 54% მიიჩნევს, რომ არ უნდა მოიხადოს ადამიანმა ამისთვის სასჯელი, 40% ფიქრობს, რომ უნდა მოიხადოს, ხოლო 6%-ს კითხვაზე პასუხი არ აქვს.
NDI-ს გამოკითხვა „გირჩის" ლიდერების სარჩელზე საკონსტიტუციო სასამართლოს გადაწყვეტილების გამოცხადებამდე ჩატარდა.
_____________________________________________________
საზოგადოების განწყობა საქართველოში 2018 წლის ივნისის გამოკითხვის შედეგები NDI-ის დაკვეთით CRRC-საქართველომ ჩაატარა.
კვლევა წარმოებს დიდი ბრიტანეთის მთავრობის UK aid-ის ფინანსური ხელშეწყობით.
საველე სამუშაოების თარიღები: 23 ივნისი - 8 ივლისი, 2018. 2409 დასრულებული ინტერვიუ (49% გამოპასუხება). საშუალო ცდომილების ზღვარი +/- 1,9%
მეთოდოლოგია
NDI და CRRC კვლევაში იყენებს სტრატიფიცირებული და კლასტერული შერჩევის მეთოდს
სტრატიფიცირება – მოსახლეობის დაყოფა შედარებით ჰომოგენურ ჯგუფებად
კლასტერინგი – თითოეული ჯგუფიდან (სტრატა) პატარა გეოგრაფიული არეალების შემთხვევითი შერჩევა
შინამეურნეობის შერჩევა მოხდა შემთხვევითი შერჩევის პრინციპით
რესპონდენტების შერჩევა მოხდა კიშის ცხრილის გამოყენებით
არ ხდება შემთხვევით შერჩეული შინამეურნეობის ან პიროვნების ჩანაცვლება
ყველა ინტერვიუ ჩატარდა პირისპირ ინტერვიუს მეთოდით, სამიდან რომელიმე ენაზე: ქართული, სომხური და აზერბაიჯანული.